აზერბაიჯანში სპეციალური საკარანტინო რეჟიმის მოქმედების ვადა კიდევ ერთხელ გახანგრძლივდა.

აზერბაიჯანული სახელმწიფო მედიის ინფორმაციით, შესაბამის განკარგულებას ხელი ქვეყნის პრემიერმინისტრმა, ალი ასადოვმა მოაწერა.

დოკუმენტის თანახმად, ქვეყანაში კორონავირუსის ინფექციის (COVID-19) გავრცელებისა და მისი შესაძლო შედეგების პრევენციის მიზნით, რესპუბლიკის ტერიტორიაზე სპეციალური საკარანტინო რეჟიმი 2026 წლის 1-ელ ოქტომბრამდე გახანგრძლივდა.

აზერბაიჯანში "სპეციალური საკარანტინო რეჟიმი" პირველ რიგში ფუნქციონირებს როგორც სამართლებრივი ჩარჩო, რომელიც მთავრობას პანდემიასთან დაკავშირებული საზოგადოებრივი ჯანდაცვის კონტროლის მექანიზმების შენარჩუნების საშუალებას აძლევს.

აზერბაიჯანის სახმელეთო საზღვრები 2020 წლის შემდეგ სრულად დაკეტილია. ქვეყანაში შესვლა მხოლოდ საჰაერო ტრანსპორტით არის შესაძლებელი. ეს სამართლებრივი ჩარჩო მინისტრთა კაბინეტს აძლევს უფლებამოსილებას, საჭიროების შემთხვევაში, აამოქმედოს მიზნობრივი სანიტარული და ეპიდემიოლოგიური შეზღუდვები, თუმცა ყოველდღიური ცხოვრება, როგორც წესი, მკაცრი სოციალური რეგულაციების გარეშე მიმდინარეობს.