"მზად ვართ, ჩვენ გვსურს, რომ აღვადგინოთ დიპლომატიური ურთიერთობები სირიასთან", — ამის შესახებ იუსტიციის მინისტრმა პაატა სალიამ თბილისში მიმდინარე საჯარო სერვისების გაერო-ს ფორუმზე "ტვ პირველის" ჟურნალისტთან საუბრისას თქვა. აღსანიშნავია, რომ ღონისძიებას ესწრებოდა სირიის იუსტიციის მინისტრი მაზხარ ალ ვაისი. ჟურნალისტმა სალიას ჰკითხა, რა საუბრები აქვს ქართულ ოცნებას სირიასთან იმისთვის, რომ ამ უკანასკნელმა აღიაროს საქართველოს ტერიტორიული მთლიანობა?

პაატა სალიამ განაცხადა, რომ სირიაში არის ახალი ხელისუფლებამ, რომელსაც აქვს მზადყოფნა, განიხილოს საქართველოს ტერიტორიული მთლიანობის აღიარება.

"იქ არის ახალი ხელისუფლებამ, რომელსაც აქვს მზადყოფნა, რომ განიხილოს აღნიშნული საკითხი [საქართველოს ტერიტორიული მთლიანობის აღიარება] და, რა თქმა უნდა, ჩვენ მზად ვართ, ჩვენ გვსურს, რომ აღვადგინოთ დიპლომატიური ურთიერთობები ამ ქვეყანასთან [სირიასთან], ვინაიდან წლების განმავლობაში ჩვენ ყოველთვის კარგი ურთიერთობა გვქონდა, როგორც ხალხებს შორის, ასევე იყო ბიზნეს ურთიერთობა, იყო პოლიტიკური ურთიერთობა. თუმცა, იმ ნაბიჯმა, რაც გადადგა ასადის ხელისუფლებამ, ეს ყველაფერი ჩიხში შეიყვანა და მოგვიწია დიპლომატიური ურთიერთობების გაწყვეტა.

იმასაც გეტყვით, რომ დავაფიქსირე ჩემი, როგორც პირადად ერთი ადამიანის პოზიცია, არა მარტო როგორც სახელმწიფოს წარმომადგენლის და მინისტრის — მე თავად ვარ აფხაზეთიდან წამოსული, მე ვიცი რა არის ომი, მე ვიცი რა არის დევნილობა და, შესაბამისად, რა თქმა უნდა, ჩემთვის, გარდა იმისა, რომ სახელმწიფოებრივი მნიშვნელობის აქტი იყო, ჩემთვის პერსონალური, ძალიან მნიშვნელოვანი დატვირთვა ჰქონდა ამას და, რა თქმა უნდა, ორივე ჭრილში — პირველ რიგში, რა თქმა უნდა, სახელმწიფოებრივ ჭრილში ვისაუბრე ამაზე და ასევე ვისაუბრე, როგორც ერთმა მოქალაქემ.

მე დავინახე მზაობა, რომ განვიხილოთ [საქართველოს ტერიტორიული მთლიანობის აღიარების საკითხი]. მან ბრძანა, რომ ისინი არიან გარდამავალ ეტაპზე, რა თქმა უნდა, ძალიან ბევრი საკითხია და, პირველი, მათთვის არის მნიშვნელოვანი, რომ სახელმწიფო ინსტიტუტები დააკომპლექტონ და შექმნან და, რა თქმა უნდა, ამაზე მზადყოფნა გამოხატა, მინისტრმა", — განაცხადა იუსტიციის მინისტრმა პაატა სალიამ "ტვ პირველთან" საუბრისას.

ცნობილია, რომ სირიას აღიარებული აქვს საქართველოს ოკუპირებული ტერიტორიები და არ აღაირებს საქართველოს ტერიტორიულ მთლიანობას.