"გაცნობებთ, რომ 2026 წლის 20 ივლისიდან იცვლება საბარათე მომსახურების ტარიფები/პირობები და საზღვარგარეთ გადარიცხვის საკომისიო", — ამ შინაარსის SMS-ები გუშინ TBC ბანკის მომხმარებლებმა მიიღეს.

ადვოკატ აკაკი ჩარგეიშვილის თქმით, ეს ყველაფერი საბოლოოდ სუპერმარკეტებში სურსათის ფასებზე აისახება და მომხმარებელზე აისახება.

"ბანკებმა გუშინ დააგზავნეს ე.წ. გამაფრთხილებელი SMS-ები და მთელს საქართველოს ამცნეს საბანკო მომსახურების, მათ შორის ფულის გადარიცხვის გაძვირების შესახებ", — ამის შესახებ სოციალურ ქსელში ადვოკატი აკაკი ჩარგეიშვილი წერს, რომ ეს ნიშნავს შემდეგს: "ქართულ კომპანიებს, იმპორტიორებს, ბიზნესებს უძვირდებათ ნედლეული, წარმოება, დისტრიბუცია, მიწოდება. ეს სიძვირე სუპერმარკეტებმა უნდა ასახონ დახლებზე და გაძვირებული ფასით უნდა შეიძინოს მომხმარებელმა, ანუ ჩვენ!"

რომელმა ბანკებმა გაზარდეს საბანკო მომსახურება და რა გავლენა შეიძლება იქიონიოს ამან ფასების ზრდაზე? — ამის გასარკვევად NEWS.On.ge "საზოგადოება და ბანკების" ხელმძღვანელს, გიორგი კეპულაძეს დაუკავშირდა.

გიორგი კეპულაძემ გვითხრა, რომ მხოლოდ TBC ბანკიდან მიიღო მსგავსი შეტყობინება, ცვლილება ეხება უცხოურ ვალუტაში გადარიცხვებს და ბანკომატიდან თანხის განაღდებას, თუმცა ეს ბაზარზე მნიშვნელოვნად არაფერს ცვლის.

"მხოლოდ TBC ბანკიდან მომივიდა sms. ცვლილება ეხება ორივეს — უცხოურ ვალუტაში გადარიცხვებს და ბანკომატიდან თანხის განაღდებას, თან თუ სახელფასო სქემაში არ ხარ ჩართული, რაღაც ერთეული შემთხვევებია... ეს მნიშვნელოვნად არაფერს ცვლის ბაზარზე, ამას ფასების ზრდას ვერ დავაბრალებთ იმიტომ, რომ რეგულარულად ვინმეს უცხოურ ვალუტაში იმდენი შემოსავალი არ აქვს, რომ სულ გადარიცხვები სჭირდებოდეს და ბანკომატიდან თანხის განაღდება. ვისაც დიდი თანხა გამოაქვს მაინცდამაინც ხშირად ბანკომატიდან უცხოურ ვალუტაში, იმისთვის საკომისიო შეიცვლება. ეს ასევე, დიდი ალბათობით, შეთანხმებულია ეროვნულ ბანკთან", — გვითხრა გიორგი კეპულაძემ და დაამატა, რომ სხვა ბანკისგან მსგავსი შეტყობინება არ მიუღია.

NEWS.On.ge-სთან საუბრისას აკაკი ჩარგეიშვილმა საკუთარ განცხადებაზე კომენტირებისას ისიც თქვა, რომ კომერციული ბანკები "თანხვედრად საქმიანობენ" და "რახან TBC-იმ გააძვირა მომსახურების ტარიფები, შესაბამისად, სხვა ბანკებიც გააძვირებენ".

ცნობისათვის, გუშინ, 18 ივნისს, TBC ბანკმა დააგზავნა მომხმარებლებთან ტექსტური შეტყობინებები იმის შესახებ, რომ 20 ივლისიდან იცვლება საბარათე მომსახურების პირობები, ასევე იზრდება ტარიფები და ფილიალის არხით უცხოურ ვალუტაში შესრულებული საერთაშორისო გადარიცხვების საკომისიო.

რის შემდეგაც თიბისის სადებეტო ბარათებზე თიბისის ბანკომატიდან უცხოურ ვალუტაში განაღდების საკომისიო განისაზღვრება: 0.6%, მინიმუმ 0.6 ერთეული შესაბამის ვალუტაში.

ცვლილება არ ვრცელდება: მოსწავლის ბარათებზე, სახელფასო პროექტში ჩართულ ბარათებზე, WM ბარათებზე, Space ბარათებზე, ბიზნეს ბარათებზე და შემდეგ ნაკრებში ჩართულ ბარათებზე: თიბისი კონცეპტ 360, თიბისი კონცეპტი, თიბისი კონცეპტის ციფრული ნაკრები, თიბისი კონცეპტის პრემიუმ ნაკრები, თიბისი კონცეპტი 360 ნაკრები და ნაკრები 10.

ამასთან, ფილიალიდან შესაძლებელია მხოლოდ “თანხის გარანტირებული” (OUR) საერთაშორისო გადარიცხვის შესრულება, რომლის მომსახურების საკომისიო განისაზღვრება: 0.4%, მინ 35 USD/EUR მაქს 500 USD/EUR;

ცვლილება არ ვრცელდება დისტანციური საბანკო მომსახურების არხებით შესრულებულ საერთაშორისო გადარიცხვის ოპერაციებზე, პირადი ბანკირის მიერ შესრულებულ სავალუტო გადარიცხვებსა და ფილიალებში, კონცეპტის სივრციდან შესრულებულ სავალუტო გადარიცხვებზე.