საგარეო საქმეთა მინისტრი, დავით ზალკალიანი უკრაინის მხარდამჭერი რეზოლუციების ირგვლივ მიმდინარე დისკუსიას ეხმაურება. მინისტრის თქმით, კარგი იქნებოდა პარლამენტს ერთიანი, კონსენსუსზე დაფუძნებული რეზოლუცია შეემუშავებინა. რეზოლუციის ტექსტში რუსეთის მოხსენიების საკითხზე აზრთა სხვადასხვაობას კი "პოლიტიკურ მანიპულაციას" უწოდებს.

"საქმე გვაქვს პოლიტიკურ მანიპულაციებთან. თუკი ნება იქნებოდა, ჩემი სურვილი იქნებოდა, რა თქმა უნდა, რომ ყოფილიყო კონსენსუსი და კონსენსუსზე დაფუძნებული ერთიანი რეზოლუცია მიეღო საქართველოს პარლამენტს. ის, რაც ხელისუფლებამ შეიტანა ტექსტში, რა თქმა უნდა, ამ რეზოლუციის მთავარი პათოსი, ჩვენი მხრიდან პოზიცია იყო ის, რომ არ იყოს დაშვებული სიტუაციის შემდგომი ესკალაცია, ნაბიჯები იყოს გადადგმული პრევენციისკენ და ყველაფერი გაკეთდეს იმისთვის, რომ თავიდან იყოს აცილებული ომი და სუვერენული ქვეყნის ტერიტორიაზე შეჭრა და მისი ფუნდამენტური საერთაშორისო სამართლის ნორმების დარღვევა.

ამ ყველაფერზე საუბარია იმ ტექსტში — საუბარია სუვერენიტეტზე, ტერიტორიული მთლიანობაზე, ღია კარის პოლიტიკაზე, სუვერენულ უფლებაზე ავირჩიოთ ჩვენი ალიანსები. რა თქმა უნდა ახლა, იქ სიტყვებზე თამაში ... მინდა იცოდეს ჩვენმა საზოგადოებამ, რომ ჩვენ არ გვეშინია ჩვენი მკაფიო პოზიციის გამოხატვის და ეს რომ ასე არის, ფაქტებით არის დადასტურებული", — განაცხადა ზალკალიანმა პალიტრანიუსის ეთერში.

მინისტრი ფიქრობს, რომ რეზოლუციის პათოსი, რომელსაც პარლამენტი მიიღებს, უნდა იყოს მხოლოდ ის, რომ მნიშვნელოვანია სიტუაციის ესკალაციის შეჩერება და ომის პრევენცია. კითხვას, იყო თუ არა საჭირო რეზოლუციის ტექსტში რუსეთის ხსენება, ზალკალიანი ასე პასუხობს:

"ჩემთვის კარგი იქნებოდა, რომ ეს თემა არ გამხდარიყო პოლიტიკური მანიპულაციების და იმის საბაბი, რომ ეს რეზოლუცია არ არის მიღებული და ცალ-ცალკე მოუწევთ პარლამნეტში [განხილვა]", — ამბობს საგარეო საქმეთა მინისტრი.

ამ დროისთვის საქართველოში უკრაინის მხარდამჭერი რეზოლუციის სამი სხვადასხვა ვერსიაა შემუშავებული. ორ მათგანში — ქართული ოცნებისა და ევროპელი სოციალისტების ტექსტში — რუსეთი ნახსენები არ არის. მესამე ვერსია, რომელშიც მკაფიოდაა ხაზგასმული რომ რუსეთი აგრესორია როგორც უკრაინასთან, ისე საქართველოსთან მიმართებაში პარტია დროამ შეიმუშავა და სხვა ოპოზიციური პარტიები თანაავტორებად მიიწვია. რეზოლუციის ამ ვერსიას უკვე შეუერთდნენ ლელო, გირჩი — მეტი თავისუფლება, რესპუბლიკური პარტია და სტრატეგია აღმაშენებელი.

გაიგე მეტი: