უკრაინის მხარდამჭერ პეტიციაზე ხელმოსაწერად სამოქალაქო მოძრაობები ხვალ, 28 ნოემბერს, 15:00 საათზე პარლამენტთან იკრიბებიან. ორგანიზატორები მოსახლეობას მოუწოდებენ, ხელი მოაწერონ პეტიციას და ამით გამოხატონ სოლიდარობა უკრაინის მიმართ.

"რადგანაც საქართველოს ხელისუფლებამ ვერ შეძლო უკრაინის მიმართ ჩვენი ქვეყნის მოქალაქეების მხარდაჭერისა და სოლიდარობის ასახვა საპარლამენტო რეზოლუციაში, ვერ გაბედა ტექსტში რუსეთის, როგორც აგრესორისა და დამნაშავის ხსენება, ჩვენ, პოლიტიკოსებმა, აქტივისტებმა და საქართველოს თითოეულმა მოქალაქემ, საკუთარი ინიციატივით მოვაწეროთ ხელი ჩვენი მეგობარი ქვეყნის მხარდამჭერ განცხადებას", — ვკითხულობთ ღონისძიების აღწერაში.

პეტიცია პარტია დროას ინიციატივით შეიქმნა და ამ დროისთვის მასზე უკვე 2 000-მდე ხელმოწერაა. მისი ტექსტი იდენტურია იმ რეზოლუციისა, რომელიც პარტიამ დღეს წარადგინა და ოპოზიციური პარტიები თანაავტორებად მიიწვია.

პარტიამ რეზოლუციის ალტერნატიული ვერსია მას შემდეგ შეიმუშავა, რაც გუშინ, 26 დეკემბერს, ქართულმა ოცნებამ დააინიცირა რეზოლუციის ტექსტი, რომელშიც რუსეთი და მის მიერ როგორც უკრაინის, ისე საქართველოს წინააღმდეგ მიმართული აგრესია ნახსენები არ არის. სწორედ ამ მიზეზით, ერთობლივი განხილვების მიუხედავად, საპარლამენტო ოპოზიციამ მას ხელი არ მოაწერა.

აღსანიშნავია, რომ უკრაინელი ხალხისა და კიევის საქალაქო საბჭოს მხარდამჭერი განცხადება დღეს თბილისის საკრებულომაც გაავრცელა. რუსეთის აგრესია არც ამ მიმართვაშია ნახსენები.

კიდევ ერთი რეზოლუცია, რომელის უკრაინის მხარდასაჭერად შემუშავდა, ევროპელ სოციალისტებს ეკუთვნით. რუსეთი არც ამ ვერსიაშია ნახსენები.

გაიგე მეტი: