საქართველოს მოქალაქეებისთვის უვიზო მიმოსვლის რეჟიმის ამოქმედებასთან დაკავშირებით, აღმასრულებელი ხელისუფლების მიერ, მიმდინარე სამუშაოების შესახებ დღეს, 17 მარტს, ევროინტეგრაციის კომიტეტის სხდომაზე იმსჯელეს.

ევრო-ატლანტიკურ სტრუქტურებში ინტეგრაციის საკითხებში სახელმწიფო მინისტრმა ვიქტორ დოლიძემ განაცხადა, რომ უკვე დაწყებულია მრავლისმომცველი საინფორმაციო კამპანია, რაც 15 აპრილამდე გაგრძელდება, თუმცა გარკვეული საინფორმაციო ხასიათის ცნობებს, უწყება უვიზო რეჟიმის ამოქმედების შემდეგაც გაავრცელებს.

ვიქტორ დოლიძის განცხადებით, მგზავრისთვის ინფორმაციის მიწოდებაში, მნიშვნელოვან როლს ითამაშებენ საერთაშორისო გამშვებ პუნქტებზე მყოფი მესაზღვრეები.

მისივე თქმით, მესაზღვრე გააფრთხილებს მგზავრს, გააჩნიათ თუ არა სადაზღვეო ბარათი, საკმარისი ნაღდი ფული, ან ნამდვილად ბიომეტრიული პასპორტი აქვთ თუ არა, რათა მერე უკვე ევროკავშირის მესაზღვრესთან არ შეექმნათ პრობლემა.

ამასთან, შს მინისტრის მოადგილემ შალვა ხუციშვილმა აღნიშნა, რომ თუ მგზავრის დოკუმენტები არასრულყოფილი იქნება, საქართველოს მესაზღვრეს მისი შეკავების უფლება არ ექნება, თუმცა მაქსიმალურად განუმარტავს, რომ შეუძლებელი იქნება მისი ევროკავშირში შესვლა.

ვიქტორ დოლიძის თქმით, ევროპელი და ქართველი მესაზღვრეები მუდმივად გაცვლიან ინფორმაციას, თუ რამდენმა გადაკვეთა საზღვარი, ვინ გადაკვეთა და რამდენი დაბრუნდა.

საგარეო საქმეთა მინისტრის მოადგილემ ზვიად გონაძემ აღნიშნა, რომ თუკი საქართველოს მოქალაქე ევროკავშირის ზონაში 90 დღეზე მეტს დაჰყოფს, იგი ჩაითვლება არალეგალად და ამას მოჰყვება შენგენის ზონაში შესვლის აკრძალვა ან ზოგიერთი წევრმა ქვეყანამ შეიძლება ადმინისტრაციული სახის ჯარიმა გამოიყენოს.

მისივე განმარტებით, უვიზო მიმოსვლის შეჩერების მექანიზმი ამოქმედდება იმ შემთხვევებში:

  • თუ შენგენის ზონაში უკანონოდ მყოფი პირების რაოდენობისა და შენგენის ტერიტორიაზე შესვლაზე უარის თქმა მნიშვნელოვანად გაიზრდება, რაც 50 პროცენტზე მეტ ზრდას ითვალისწინებს;
  • შეჩერებაზე იმოქმედებს თავშესაფრის მოთხოვნაზე განცხადებების მნიშვნელოვანი ზრდა;
  • ევროკავშირის წევრი ქვეყნიდან რეადმისიის განცხადებაზე უარის თქმა.

სხდომაზე ასევე ისაუბრეს ევროკავშირის ქვეყნებში არალეგალურად მყოფ საქართველოს მოქალაქეებზე და დეპორტირებულ პირებზე.

საკონსულო დეპარტამენტის უფროსის მოადგილემ, ინგა კიკვაძემ განაცხადა, რომ წარსულში დეპორტირებულ პირებისთვის, უვიზო რეჟიმით სარგებლობის უფლება მათი დეპორტაციის მიზეზზეა დამოკიდებული:

"თუ დეპორტაცია განპირობებული იყო მათ მიერ რაიმე მძიმე დანაშაულის ჩადენით, რა თქმა უნდა, უფრო ხანგრძლივი ან სრული შეზღუდვა ჰქონდეთ დაწესებული, ხოლო თუ მცირე ვადით ან ერთ წლამდე შეზღუდულები არიან, ერთი წლის გავლის შემდეგ, ისინი ისარგებლებენ უვიზო რეჟიმით".

მისივე თქმით, ევროკავშირში არალეგალურად მყოფ პირებზე პირდაპირ ვერ გავრცელდება უვიზო მიმოსვლის რეჟიმი და ამისათვის მათ თავიანთი სტატუსი უნდა შეიცვალონ. კიკვაძე ბოლო პერიოდში უკან დასაბრუნებელი მოწმობების გაცემის ზრდაზე მიუთითებს და მისი განმარტებით, ემიგრანტები ნებაყოფლობით ბრუნდებიან საქართველოში, რათა შემდეგ უკვე ლეგალურად შეეძლოთ იქ შესვლა.

გადაწყვეტილება საქართველოს მოქალაქეებისთვის უვიზო მიმოსვლის შესახებ, ევროკავშირის ოფიციალურ ჟურნალში 8 მარტს გამოქვეყნდა. აღნიშნული ნიშნავს, რომ ხვალიდან ათ დღეში, ანუ 28 მარტიდან, საქართველოს ბიომეტრიული პასპორტის მქონე მოქალაქეები ევროპაში მოგზაურობას უვიზოდ შეძლებენ.

რა უნდა ვიცოდეთ ევროკავშირში უვიზოდ მოგზაურობისთვის?