ქართული ოცნების წარმომადგენელი, შალვა პაპუაშვილი, ეთანხმება სოზარ სუბარის იმ განცხადებას, სადაც მან სასამართლო სისტემაზე საქართველოს პარტნიორების და მათ შორის, ელჩების შეფასებები გადაჭარბებულად შეაფასა. მთავარი არხის წამყვანის კითხვაზე, ეთანმხება თუ არა სუბარის ამ განცხადების სულისკვეთებას, ის პასუხობს:

"რაც შეეხება პროცედურებს, რომლებიც კანონმდებლობით არის გაწერილი, ის პროცედურები უნდა განხორციელდეს კანონმდებლობის შესაბამისად და რა თქმა უნდა, ამაზე უარის თქმა არ შეუძლია არც დეპუტატს, არც სახალხო წარმომმადგენელს, ამიტომ კანონები უნდა შესრულდეს.

ვეთანხმები სოზარ სუბარსაც და ვეთანხმები ყველა ჩვენს მოქალაქეს, რომელიც ამბობს, რომ ჩვენ უნდა ვიმოქმედოთ კანონების შესაბამისად, იმ დემოკრატიული ლეგიტიმაციის ფარგლებში, რომელიც ჩვენ გვაქვს".

ამასთან, მან კმაყოფილება გამოთქვა მოსამართლეების მიერ ერთობლივად გაკეთებული განცხადების გამო, სადაც მათ კრიტიკა "დისკრედიტაციად" შეაფასეს. მისი თქმით, "კარგია, მოსამართლეებმა განცხადება რომ გააკეთეს იმიტომ, რომ ეს ეხება სასამართლო სისტემას და რა თქმა უნდა, მათ უნდა ისაუბრონ".

გადაცემაში სასამართლო თემაზე საუბრისას მან აქცენტი პროცედურებზე გააკეთა და თქვა, რომ 19 აპრილის დოკუმენტში გათვალისწინებული საკითხების შესრულება მარტიდან დაწყებულია.

"მართლმსაჯულების საკითხს 19 აპრილის შეთანხმებაში ორი საკითხი ეხება — ერთი ეს გახლავთ რეფორმა სხვადასხვა მიმართულებით, რომელიც არის ერთწლიანი პროცესი და 2022 წლის გაზაფხულისთვის უნდა დასრულდეს; მეორე საკითხი კი ეხება კონკრეტულად უზენაესი სასამართლოს მოსამართლეების დანიშვნას. კერძოდ წერია, რომ არსებულ სისტემას აქვს ხარვეზი და საჭიროებს შესაბამისობაში მოყვანს ვენეციის კომისიის რეკომენდაციებთან. ამიტომ დროებით უნდა შეჩერდეს შერჩევა, გამოსწორდეს ეს საკანონმდებლო ხარვეზი და დაუახლოვდეს ვენეციის კომისიის დასკვნას, შემდეგ განახლდეს და დასრულდეს. ახლა სად ვიმყოფებით — ეს პროცესი მარტში შეჩერდა, აპრილში შეიცვალა კანონი, პროცესი განახლდა აპრილში და მიდის დასრულებისკენ", — ამბობს პაპუაშვილი.

როგორც ის განმარტავს, სასამართლო რეფორმაზე რეალურად "საპრეტენზიო არაფერია".

17 ივნისს იუსტიციის უმაღლესი საბჭოს სხდომაზე მოსამართლეობის კანდიდატთა შესარჩევი კონკურსის კენჭისყრა გაიმართა, სადაც თანამდებობაზე 46 მოსამართლე დაინიშნა. გარდა ამისა, საბჭო პარლამენტს უზენაესი სასამართლოს მოსამართლეობის 9 კანდიდატს წარუდგენს.

არასამთავრობო ორგანიზაციების განცხადებით, იუსტიციის უმაღლესი საბჭო აგრძელებს მართლმსაჯულებისთვის დამაზიანებელი ნაბიჯების გადადგმას. ორგანიზაციები აღნიშნავენ, რომ მოსამართლეების სიმცირე მნიშვნელოვანი პრობლემაა, თუმცა ახლა კადრების დამატება სასამართლოში არსებული ძლიერი ე.წ. კლანური მმართველობის პირობებში მიმდინარეობს. ამ თემაზე კრიტიკული განცხადებები ჰქონდათ საერთაშორისო პარტნიორებსაც, ისინი მმართველ გუნდს შეთანხმების პირობების შესრულებისკენ მოუწოდებენ.

გაიგეთ მეტი: