ტაილანდში მცხოვრებ ექვსი წლის ბავშვს, რომლის უკანასკნელი სურვილი ჯუჯა ჰიპოპოტამის, მუ დენგის ნახვა იყო, გარდაცვალებამდე ოცნება შეუსრულეს. ბავშვი, რომელსაც მეტსახელად აუტოს ეძახდნენ, დიდი ხნის განმავლობაში ოცნებობდა მუ დენგის ნახვაზე, რომელმაც შარშან სოციალურ ქსელებში თავბრუდამხვევი პოპულარობა მოიპოვა.

მუ დენგის მომვლელებმა, ხამუმ და მისმა გუნდმა, სოციალურ მედიაში გაავრცელეს მტკივნეული ინფორმაცია აუტოს გარდაცვალების შესახებ და აღნიშნეს, რომ მან მაინც შეძლო ჰიპოპოტამთან ერთად ერთი ლამაზი საღამოს გატარება.

მუ დენგმა ვირუსული პოპულარობა წინა წელს მოიპოვა

მუ დენგმა ვირუსული პოპულარობა წინა წელს მოიპოვა

ფოტო: @khamoo.andthegang/ IG

"გასული წლის ბოლოს, ექიმების ჯგუფი დაგვიკავშირდა ექვსი წლის ბავშვთან დაკავშირებით, რომელსაც ტერმინალური სტადიის სიმსივნე ჰქონდა. მას ძალიან უყვარდა მუ დენგი და უნდოდა სიცოცხლეში ერთხელ მაინც ენახა," — დაწერა ზოოპარკის გუნდმა სოციალურ ქსელში.

ზოოპარკმა დაუყოვნებლივ დააორგანიზა აუტოს ვიზიტი, მიუხედავად იმისა, რომ მუ დენგის სანახავად რიგში უამრავი ადამიანი იყო. აუტომ ზოოპარკი ჩინური ახალი წლის პერიოდში მოინახულა, მშობლებთან და ექიმებთან ერთად.

ფოტო: @khamoo.andthegang/ IG

ჯუჯა ჰიპოპოტამის მომვლელებმა აღნიშნეს, რომ იმ დღეს მუ დენგმა მოულოდნელად მაყურებელთათვის განკუთვნილ ადგილთან ახლოს დაისვენა და არა წყალში, როგორც ეს ჩვეულებრივ უყვარს — თითქოს იგრძნო, რომ ეს ვიზიტი ძალიან მნიშვნელოვანი იყო.

შემდეგ ზოოპარკის თანამშრომლებმა აუტო სუვენირების შესარჩევად წაიყვანეს. მან კაპიბარა აირჩია — ცხოველი, რომელიც ასევე ძალიან უყვარდა. "ძალიან ბედნიერები ვიყავით, რომ მისთვის ამ ბედნიერი მოგონების შექმნა შევძელით," — თქვეს პოსტში მუ დენგის მომვლელებმა.