324 ხმით 25-ის წინააღმდეგ, ევროპარლამენტმა მიიღო რეზოლუცია საქართველოში მედიის თავისუფლების, კერძოდ, მზია ამაღლობელის საქმის შესახებ.

რეზოლუციაში აღნიშნულია, რომ ევროპარლამენტი გმობს მზია ამაღლობელის პოლიტიკური მოტივით გამოწვეულ დაპატიმრებასა და მოითხოვს მის და სხვა პოლიტპატიმრების — მათე დევიძის, ოპოზიციის ლიდერების — ზურაბ ჯაფარიძის, ნიკა მელიას, ნიკა გვარამიას და საქართველოს მე-3 პრეზიდენტის, მიხეილ სააკაშვილის გათავისუფლებას.

რეზოლუციის მიხედვით, ევროპარლამენტი:

• მკაცრად გმობს ქართული ოცნების რეჟიმის სისტემურ თავდასხმას დემოკრატიულ ინსტიტუტებზე, პოლიტიკურ ოპოზიციაზე, დამოუკიდებელ მედიაზე, სამოქალაქო საზოგადოებაზე და სასამართლოს დამოუკიდებლობაზე;
• ღრმა შეშფოთებას გამოთქვამს საქართველოში ჟურნალისტების თვითნებური დაკავებების, ძალადობისა და შევიწროების გამო, მათ შორის, ცილისწამების კამპანიების, სამართლებრივი დევნის, გენდერული ძალადობის შემთხვევების გამო; მოუწოდებს ხელისუფლებას, დაუყოვნებლივ შეწყვიტოს დაშინება და უზრუნველყოს ჟურნალისტების უსაფრთხოება და თავისუფლება; ჩატარდეს დამოუკიდებელი გამოძიება;
• მოუწოდებს საქართველოს ხელისუფლებას, დაუყოვნებლივ გაათავისუფლოს ყველა პოლიტიკური პატიმარი და სხვა უკანონოდ დაკავებული პირები, როგორიცაა აქტივისტი მათე დევიძე, ოპოზიციის ლიდერები: ზურაბ ჯაფარიძე, ნიკა მელია, ნიკა გვარამია და საქართველოს ყოფილი პრეზიდენტი მიხეილ სააკაშვილი; გმობს ნაციონალური მოძრაობის თავმჯდომარის, თინა ბოკუჩავას მეუღლის ძალადობრივ გატაცებას და ინფორმაციას მისი შვილების უსაფრთხოებაზე მუქარის შესახებ;
• მოითხოვს ყველა რეპრესიული კანონმდებლობის დაუყოვნებლივ გაუქმებას, დემოკრატიის აღდგენას და მედიის თავისუფლებისა და სამოქალაქო თავისუფლებების სრულ დაცვას;
  მოუწოდებს ევროკავშირს, უცხოური აგენტების კანონის ამოქმედების შემდეგ გააძლიეროს მხარდაჭერა საქართველოს დამოუკიდებელი მედიისა და სამოქალაქო საზოგადოებისადმი და აკონტროლოს მიმდინარე სასამართლო პროცესები;
• გამოხატავს სინანულს საბჭოს, წევრი სახელმწიფოებისა და კომისიის მუდმივი უმოქმედობის გამო და კიდევ ერთხელ მოუწოდებს წევრ სახელმწიფოებს, დაუწესონ ორმხრივი სანქციები ქართული ოცნების იმ ლიდერებსა და ოფიციალურ პირებს, რომლებიც დემოკრატიულ უკუსვლაზე არიან პასუხისმგებელნი;
• გამოთქვამს შეშფოთებას არასამთავრობო ორგანიზაციებზე განხორციელებული ბოლო შეტევების ტალღის გამო, რაც გამოიხატება იმაში, რომ ზოგიერთი სახელმწიფო უწყება, მაგალითად, ანტიკორუფციული ბიურო მათგან ითხოვს ბოლო წელიწად-ნახევრის პერიოდის დეტალურ ფინანსურ, იურიდიულ და ოპერატიულ ინფორმაციას და ამას მოითხოვს მხოლოდ სამ სამუშაო დღეში; ხაზს უსვამს, რომ ეს მოთხოვნა თავიდანვე არარეალურია და ქმნის რისკს, რომ მიზანში ამოღებული ორგანიზაციები პარალიზებული აღმოჩნდნენ და მათი საქმიანობა შეჩერდეს, — ნათქვამია რეზოლუციაში (ნეტგაზეთის თარგმანი).

ევროპარლამენტში საქართველოში მედიის თავისუფლებისა და მზია ამაღლობელის შესახებ დებატები გაიმართება, რომლის შემდეგაც რეზოლუციას მიიღებენ

"ევროსკოპი": ევროპარლამენტი ახალი რეზოლუციით მზია ამაღლობელის დაუყოვნებლივ და ყოველგვარი პირობის გარეშე გათავისუფლებას ითხოვს

მალგოჟატა გოშიევსკა: "ქართულ ოცნებას" ისე ეშინია თავისუფალი მედიის, როგორც ვამპირს სინათლის, რადგან იცის, რომ მხოლოდ ჩრდილში შეუძლიათ გადარჩენა

ლენა შილინგი: მზია არის იმ მოძრაობის სახე, რომელიც რეპრესიების მიუხედავად, აგრძელებს ბრძოლას დემოკრატიისა და ევროპული მომავლისათვის