23 ივნისს, ევროპული საბჭოს ევროკავშირის საგარეო საქმეთა მინისტრების შეხვედრაზე ბრიუსელში, მიმდინარე საქმეების ბლოკში საქართველოს საკითხს განიხილავენ.

საგარეო საქმეთა საბჭოს შემდეგი სხდომა ბრიუსელში, 23 ივნისს თბილისის დროით 11:30 საათზე დაიწყება და მას ევროკავშირის საგარეო საქმეთა და უსაფრთხოების პოლიტიკის უმაღლესი წარმომადგენელი, კაია კალასი უხელმძღვანელებს.

საქართველოსთან ერთად განსახილველ საკითხებს შორისაა: რუსეთის აგრესია უკრაინის წინააღმდეგ; ჩინეთი და ევროპული უსაფრთხოება. ამას გარდა, საბჭო დისკუსიას გამართავს ჩინეთისა და ევროპული უსაფრთხოების საკითხებზე და ახლო აღმოსავლეთსა და ლიბიაში არსებული ვითარებაზე.

"საბჭო განიხილავს ირანზე ისრაელის მიერ განხორციელებული დარტყმების შემდეგ ახლო აღმოსავლეთში ბოლო დროს განვითარებულ მოვლენებს და ირანის საპასუხო რეაქციას. დისკუსია ასევე შეეხება ღაზასა და ლიბიაში არსებულ კრიზისს", — ნათქვამია ევროპული საბჭოს ვებგვერდზე გავრცელებულ ინფორმაციაში.

შეგახსენებთ, რომ მიმდინარე წლის 17 ივნისს ცნობილი გახდა, რომ ევროპული საბჭო და ევროპარლამენტი მესამე ქვეყნებისთვის შენგენის ზონაში უვიზო მიმოსვლის შეჩერების მექანიზმის განახლებაზე შეთანხმდნენ.

ევროპულმა საბჭომ და ევროპარლამენტმა მიაღწიეს შეთანხმებას უვიზო მიმოსვლის შეჩერების განახლებულ მექანიზმზე

11 ივნისს პოლონეთის პრემიერმინისტრმა, დონალდ ტუსკმა თქვა, რომ მისი მთავრობა ევროკავშირის წევრ ქვეყნებთან მუშაობს, რათა საქართველოს მოქალაქეებისთვის შენგენის ზონაში უვიზო მიმოსვლის რეჟიმი გაუქმდეს. აღსანიშნავია, რომ პოლონეთის ევროკავშირის თავჯდომარე ქვეყანის პოზიციას 1 ივლისამდე იკავებს.

პოლონეთის პრემიერმინისტრი საქართველოსთვის უვიზო რეჟიმის შეჩერებაზე მუშაობს

რადიო თავისუფლების ევროპის ბიუროს რედაქტორი, რიკარდ იოზვიაკის ინფორმაციით, სავიზო შეზღუდვა შესაძლოა შეეხოს 61 ქვეყანას. ის ჩამოთვლის 4 მიზეზს, რაც ამ 61 ქვეყანაში უვიზო მიმოსვლის შეჩერების საფუძვლად შეიძლება განიხილოს. ესენია: 1. ევროკავშირში არალეგალური მიგრაციის ნებისმიერი ფორმის წინააღმდეგ ბრძოლა; 2. ვიზების პოლიტიკის მესამე ქვეყნებზე ზეწოლის პოლიტიკურ ინსტრუმენტად გამოყენება; 3. ე.წ. ჰიბრიდული საფრთხეები.

როგორც იოზვიაკი წერს, მეოთხე მიზეზი მესამე ქვეყნებთან ევროკავშირის პოლიტიკურ ურთიერთობებს უკავშირდება. "კანონპროექტში ნათქვამია, რომ შეჩერების მექანიზმის ამოქმედება შესაძლებელია "ადამიანის უფლებების სერიოზული დარღვევების" ან "საერთაშორისო სამართლისა და სტანდარტების, მათ შორის ადამიანის უფლებების შესახებ კანონის სერიოზული დარღვევებისა და საერთაშორისო სასამართლოს გადაწყვეტილებებისა და გადაწყვეტილებების შეუსრულებლობა."