ქართული ოცნების დეპუტატის გია ვოლსკის თქმით, ეუთო/ოდირის არჩევნებზე დაკვირვების პრაქტიკა "მსოფლიოში არ არის" და ეს ოპოზიციის მხრიდან "ფანდია", რადგან 2024 წლის არჩევნებში ეუთო/ოდირმა ოპოზიციისთვის "დადებითი გადაწყვეტილებები დადო".

"ზოგადად, ადგილობრივ არჩევნებში ეუთო/ოდირის დაკვირვების მისია გათვალისწინებული არ არის. ამის პრაქტიკა მსოფლიოში არ არის, მაგრამ ამავე დროს [ოპოზიციის მხრიდან] ეუთო/ოდირის ჩამოსვლის მოთხოვნა არის გარკვეული ფანდი იმისთვის, რომ თავისივე უარყოფილი ორგანიზაცია, რომელთა ხელმძღვანელებზე ზეწოლა მოახდინეს, პოლიტიკურად დაამცირეს და სერიოზულად გაილაშქრეს მის წინააღმდეგ მას მერე, რაც მათ საქართველოსთან მიმართებაში 2024 წლის ოქტომბერში პოზიტიური გადაწყვეტილება დადეს. ახლა მათ ჩამოსვლას ითხოვენ, რაც თვალთმაქცობაა," — განაცხადა ვოლსკიმ.

შეგახსენებთ, 11 ივნისს საქართველოში ბრიტანეთის საელჩომ განცხადება გაავრცელა, სადაც წერია, რომ "უწევთ გააუქმონ დაგეგმილი საგრანტო წინადადებები, რომლებიც მიზნად ისახავდა დაგეგმილი მუნიციპალური არჩევნების გამჭვირვალობისა და კონკურენტუნარიანობის მხარდაჭერას".

საელჩო ოცნების ხელისუფლებას მოუწოდებს, რომ "მოიწვიოს ეუთო/ოდირის მისია ოქტომბრის მუნიციპალური არჩევნების დასაკვირვებლად და გაითვალისწინოს 2024 წლის საპარლამენტო არჩევნებთან დაკავშირებით ოდირის საბოლოო ანგარიშში გაცემული ყველა რეკომენდაცია".

ოცნების პრემიერის ირაკლი კობახიძის აზრით, "ზედმეტი იქნება ეუთო/ოდირის დატვირთვა ჩვენი თვითმმართველობის არჩევნებით და ადგილობრივი თვითმმართველობის არჩევნები ჩატარდება აბსოლუტურად ჯანსაღი ფორმით". კობახიძემ ასევე დასძინა, რომ თვითმმართველობის არჩევნებზე ეუთო/ოდირს მოწვევა "არ არის პრაქტიკა".

ცნობისთვის, ნეტგაზეთის ინფორმაციით, ქართული ოცნების მმართველობისას ეუთო/ოდირში არჩევნებზე დაკვირვების მოწვევა ყოველ წელს იგზავნებოდა. ეუთო/ოდირი ყველა არჩევნებს აკვირდებოდა, მათ შორის საპრეზიდენტო და საპარლამენტოსაც. გამონაკლისი იყო 2014 წლის მუნიციპალური არჩევნები, როდესაც ოცნებამ ეუთო/ოდირი მოიწვია, მაგრამ ფინანსური პრობლემების გამო ვერ დააკვირდნენ.