არასამთავრობო ორგანიზაციების განცხადებით, იუსტიციის უმაღლესი საბჭო აგრძელებს მართლმსაჯულებისთვის დამაზიანებელი ნაბიჯების გადადგმას. ისინი საბჭოს სხდომას ეხმაურება, სადაც მოსამართლის 100-მდე ვაკანსიის შევსების შესახებ გადაწყვეტილება მიიღება. გარდა ამისა, უზენაესი სასამართლოს მოსამართლეობის კანდიდატად საბჭომ პარლამენტს 9 კანდიდატი უკვე წარუდგინა.

ორგანიზაციები აღნიშნავენ, რომ მოსამართლეების სიმცირე მნიშვნელოვანი პრობლემაა, თუმცა ახლა კადრების დამატება სასამართლოში არსებული ძლიერი ე.წ. კლანური მმართველობის პირობებში მიმდინარეობს.

"მიუხედავად მრავალი მოწოდებისა, მათ შორის, ჩვენი საერთაშორისო პარტნიორების მხრიდან, არ აჩვენეს მართლმსაჯულების გაჯანსაღების და სისტემის რეალური რეფორმის ნება, მათ შორის არ შეიცვალა საბჭოს არამოსამართლე წევრების არჩევისა და საბჭოს მიერ გადაწყვეტილებების მიღების წესი, რაც საუკეთესო და მიუკერძოებელი კანდიდატების დანიშვნას უზრუნველყოფდა", — აღნიშნულია განცხადებაში.

როგორც ისინი აცხადებენ, მსგავსი სიღრმისეული რეფორმების განხორციელების გარეშე, ამგვარი მნიშვნელობის საკადრო გადაწყვეტილებების დაჩქარებულ ტემპში მიღება, უკიდურესად აზიანებს მართლმსაჯულების ინტერესებს:

"ცხადია ამგვარ გაბედულ ნაბიჯებს სასამართლოში არსებული ე.წ. კლანი და იუსტიციის უმაღლესი საბჭო ვერ გადადგამდა ხელისუფლების უპირობო მხარდაჭერის გარეშე. მმართველი პარტიის მიერ კლანის არსებობის იგნორირება და ზედაპირული, კოსმეტიკური რეფორმირების დაანონსება კიდევ ერთხელ მიუთითებს პოლიტიკური ნების არ არსებობაზე, სასამართლო სისტემაში განხორციელდეს თვისობრივი ცვლილებები და შესრულდეს დასავლელი პარტნიორების შუამავლობით მიღწეულ შეთანხმებაში აღებული ვალდებულებები".

არასამთავრობო ორგანიზაციები მოუწოდებენ იუსტიციის უმაღლეს საბჭოს შეწყვიტოს ფორსირებულ რეჟიმში სასამართლო კორპუსის დაკომპლექტება. ამასთან, ის მოუწოდებს პარლამენტს დროულად დაიწყოს მართლმსაჯულების ფუნდამენტური რეფორმა.

განცხადებაზე ხელმომწერი ორგანიზაციები:

  • საერთაშორისო გამჭვირვალობა — საქართველო;
  • ღია საზოგადოების ფონდი;
  • ინფორმაციის თავისუფლების განვითარების ინსტიტუტი;
  • საქართველოს დემოკრატიული ინიციატივა;
  • უფლებები საქართველო;
  • სოციალური სამართლიანობის ცენტრი (ყოფილი EMC);
  • სამართლიანი არჩევნებისა და დემოკრატიის საერთაშორისო საზოგადოება (ISFED).