ოცნების პრემიერის, ირაკლი კობახიძის განცხადების შემდეგ, რომლის თანახმადაც, თვითმმართველობის არჩევნებზე ეუთო/ოდირის მისიის მოწვევას არ აპირებენ, ფორმულამ ეუთო/ოდირ-ს კითხვით მიმართა.

საერთაშორისო სადამკვირვებლო მისიის მიერ ტელეკომპანიისთვის გაგზავნილ პასუხში აღნიშნულია, რომ 2014 წლის გამონაკლისის გარდა, როდესაც შეზღუდული ბიუჯეტის გამო საქართველოში თვითმმართველობის არჩევნებს ვერ დააკვირდნენ, ეს პირველი არჩევნები იქნება, რომელზეც არ იწვევენ.

ეუთო/ოდირში აღნიშნავენ, რომ მათი სადამკვირვებლო მისიის არსებობა ხელს უწყობს პროცესის გამჭვირვალობას.

"საქართველოში პირველი საყოველთაო ადგილობრივი არჩევნები 2002 წელს ჩატარდა და მას შემდეგ, ODIHR-ს რეგულარულად იწვევენ საქართველოში ყველა ადგილობრივ არჩევნებზე დასაკვირვებლად. ჩვენ სადამკვირვებლო მისიები გავგზავნეთ ყველა არჩევნებზე, გარდა ერთისა (2014 წელს, შეზღუდული ბიუჯეტის გამო).

ODIHR-ის სადამკვირვებლო მისიის არსებობა ხელს უწყობს პროცესის გამჭვირვალობას, ხოლო ჩვენი რეკომენდაციები ხელს უწყობს არჩევნების მთლიანობის გაძლიერებას ადგილობრივ დონეზე.

გასული ორი ათწლეულის განმავლობაში ODIHR არაერთ მუნიციპალურ არჩევნებს დააკვირდა. ბოლო მაგალითებია: ბოსნია და ჰერცეგოვინაში ჩატარებული ადგილობრივი არჩევნები 2024 წლის ოქტომბერში, სერბეთში – 2024 წლის ივნისში და მოლდოვაში – 2023 წლის ნოემბერში", - განაცხადეს ეუთო/ოდირში.

ცნობისთვის, ქართული ოცნება ადგილობრივი თვითმმართველობის არჩევნებისთვის ეუთო/ოდირის მოწვევას არ აპირებს. ოცნების პრემიერის ირაკლი კობახიძის აზრით "ზედმეტი იქნება ეუთო/ოდირის დატვირთვა". გუშინ, 18 ივნისს კობახიძემ განაცხადა, რომ ადგილობრივი არჩევნების დასაკვირვებლად ეუთო/ოდირის მოწვევის პრაქტიკა ზოგადად არ არსებობს და ეს მხოლოდ საპარლამენტო არჩევნებს ეხება. მისი თქმით, "ადგილობრივი თვითმმართველობის არჩევნები ჩატარდება აბსოლუტურად ჯანსაღი ფორმით".

"რაც შეეხება ეუთო/ოდირს, თქვენ იცით, რომ არის ასეთი პრაქტიკა, რომ თვითმმართველობის არჩევნებზე იწვევდნენ ეუთო/ოდირს. გადახვევები გვხვდება, მათ შორის, ჩვენც გვქონდა ასეთი გადახვევა 2021 წელს, გამომდინარე იქიდან, რომ რაღაცნაირად ეს არჩევნები იყო დაკავშირებული საპარლამენტო არჩევნების თემასთან.

…ჩვენ ვფიქრობთ, რომ ამ შემთხვევაში ზედმეტი იქნება ეუთო/ოდირის დატვირთვა ჩვენი თვითმმართველობის არჩევნებით და ადგილობრივი თვითმმართველობის არჩევნები ჩატარდება აბსოლუტურად ჯანსაღი ფორმით", — განაცხადა ირაკლი კობახიძემ.

მის განცხადებას წინ უძღოდა საქართველოში ბრიტანეთის საელჩოს განცხადება. სადაც საელჩო ოცნების ხელისუფლებას მოუწოდებს, რომ "მოიწვიოს ეუთო/ოდირის მისია ოქტომბრის მუნიციპალური არჩევნების დასაკვირვებლად და გაითვალისწინოს 2024 წლის საპარლამენტო არჩევნებთან დაკავშირებით ოდირის საბოლოო ანგარიშში გაცემული ყველა რეკომენდაცია".

ირაკლი კობახიძე: ამ შემთხვევაში ზედმეტი იქნება ეუთო/ოდირის დატვირთვა ჩვენი თვითმმართველობის არჩევნებით