"სამოქალაქო საზოგადოების ფონდის" იურისტი საბა ბრაჭველი სოციალურ ქსელში წერს, რომ ანტიკორუფციული ბიურო არასამთავრობო ორგანიზაციებისგან პერსონალური ინფორმაციის გამოთხოვის საფუძვლად ასახელებს — არჩევნებზე სადამკვირვებლო და მოქალაქეების მისვლის ხელშემწყობი კამპანიების ჩატარებას.

იურისტი ასევე ხაზს უსვამს იმ ფაქტს, რომ ქართული ოცნება წლევანდელ თვითმმართველობის არჩევნებზე სადამკვირვებლო მისიით ეუთო/ოდირის მოწვევას არ აპირებს და გაერთიანებულ სამეფოს "უწევს გააუქმონ დაგეგმილი საგრანტო წინადადებები, რომლებიც მიზნად ისახავდა დაგეგმილი მუნიციპალური არჩევნების გამჭვირვალობისა და კონკურენტუნარიანობის მხარდაჭერას".

"უკვე იცით, რომ 17 ივნისს, რაჟდენ კუპრაშვილის მოთხოვნის საფუძველზე, ხუთ ორგანიზაციას განჩინებებით დაგვავალა, გავცეთ მესამე პირების განსაკუთრებული კატეგორიის პერსონალური მონაცემები (ვინაობები, ფოტოსურათები, მიმოწერა, სხვა ინფორმაციები), რაც ბოლო 17 თვეში ჩვენთან ინახება. იცით, რომ განჩინებებში არ იკვეთება მოთხოვნის ფაქტობრივი საფუძვლები, ხოლო სასამართლომ შუამდგომლობა დააკმაყოფილა იმ ნორმის საფუძველზეც, რომელიც საერთოდ არ არსებობს.

ჩვენ მოვითხოვეთ და გუშინ მივიღეთ ბიუროს შუამდგომლობა, რომლითაც ეს ყველაფერი მოითხოვეს. ინფორმაციის გამოთხოვის პირველ საფუძვლად დასახელებულია ის, რომ ჩვენ ვატარებდით როგორც არჩევნებზე დაკვირვების, ისე — არჩევნებზე მოქალაქეების მისვლის ხელშემწყობ (ე.წ. Get out to vote) კამპანიებს.

ანუ, ბიუროს იმპლიციტური პოზიციით, არჩევნებზე დაკვირვებაც და არჩევნებზე წასვლის პოპულარიზაციაც პოლიტიკურად საშიშ, მომეტებული ზედამხედველობის საჭიროების მქონე ქცევად არის დანახული, რომლის განმახორციელებლებსაც დამატებითი ვალდებულებები უნდა დაუწესდეთ.

შეგახსენებთ, რომ ეს ხდება კონტექსტში, სადაც რეჟიმი არ აპირებს ეუთო/ოდირის სადამკვირვებლო მისიის მოწვევას, ბრიტანეთის საელჩოს კი არ აძლევენ სადამკვირვებლო მისიების ხელშეწყობის უფლებას. მეტიც, უკვე რამდენიმე დღეა ამას პოლიტიკური ექსტრემიზმის დაფინანსების მცდელობას უწოდებენ. ძალიან მარტივი დასანახია, რომ არავითარი სამართლიანი არჩევნების ჩატარებას ეს ხალხი შემოდგომაზე არ აპირებს და, საერთოდაც, თუ დასცალდათ, ერთ მშვენიერ დღეს, ერიტრეის სტილში სრულად რომ გააუქმონ არჩევნები, დიდად არც ეგ გაგიკვირდეთ — აქეთ მიდიან," — წერს საბა ბრაჭველი.

ანტიკორუფციული ბიურო ამ ეტაპზე 5 არასამთავრობო ორგანიზაციებს მოსთხოვა ფინანსური და იურიდიული დოკუმენტაციისა და პერსონალური ინფორმაციის წარდგენა. ეს ორგანიზაციებია: "სამოქალაქო საზოგადოების ფონდი", "საერთაშორისო გამჭვირვალობა — საქართველო", "საფარი", "მომავლის აკადემია" და "ეკონომიკური პოლიტიკის კვლევის ცენტრი".

"საერთაშორისო გამჭვირვალობა — საქართველოს" იმ 5 ორგანიზაციას შორისაა, რომლებსაც ანტიკორუფციულმა ბიურომ მათი ბენეფიციარების პირადი ინფორმაციის გადაცემა მოსთხოვა. ნეტგაზეთის ინფორმაციით, ბიურომ ორგანიზაციის წინააღმდეგ სასამართლოსთვის წარდგენილ შუამდგომლობას 20-მდე მტკიცებულება დაურთო. ორგანიზაციას იმ ფეისბუქ-კამპანიების გამოც ედავებიან, რომელშიც ისინი მოქალაქეებს არჩევნებში მონაწილეობას, მათი ხმის დაცვას მოუწოდებენ.

"2024 წლის 22 ნოემბერს, "საერთაშორისო გამჭვირვალობა — საქართველოს" ოფიციალურ ფეისბუქ-გვერდზე გამოქვეყნებულია პოსტი სახელწოდებით: "ამოიღე ხმა დაიბრუნე ხმა!". ამასთან, გამოქვეყნებულ პოსტში მითითებულია: "საქართველოს მოქალაქეებს ჩვენი საერთო წარსული გვაერთიანებს და დღევანდელობას ერთნაირად ვგრძნობთ. როგორი იქნება საქართველოს მომავალი, ჩვენ, მოქალაქეებმა უნდა გადავწყვიტოთ. თუმცა გვეუბნებიან, რუსეთში გამდიდრებულმა ერთმა კაცმა ჩვენ ნაცვლად უნდა გადაწყვიტოს საქართველოს ბედი, მისმა ხმამ გადაწონოს საქართველოს ხმა. 25 ნოემბერს, სწორედ მისი ხმით დანიშნული პარლამენტი იკრიბება. ეს კრიმინალური აქტია, დანაშაულით ძალაუფლების დაუფლების მცდელობა," — წერია დოკუმენტში.

ამას გარდა, არასამთავრობო ორგანიზაციების წინააღმდეგ "ანტიკორუფციულმა ბიურომ "მტკიცებულებებად" მიუთითა არჩევნების სადამკვირვებლო პროექტი, ქართულ ოცნებასთან დაკავშირებით კრიტიკული განცხადებები, მათ შორის: ქართული ოცნების არალეგიტიმურობაზე, მმართველი პარტიის რუსულ კურსზე, ქართული ოცნების რეპრესიებზე… "მტკიცებულებებს შორისაა ასევე ამ ორგანიზაციების წარმომადგენლების სიტყვით გამოსვლები ევროკავშირის და აშშ-ის ინსტიტუტებში, — წერს ნეტგაზეთი.

შეგახსენებთ, ანტიკორუფციული ბიუროს ხელმძღვანელმა, რაჟდენ კუპრაშვილმა 18 ივნისს გამართულ ბრიფინგზე განაცხადა, რომ სიცრუეა გავრცელებული ინფორმაცია იმის შესახებ, რომ მისი უწყება არასამთავრობო ორგანიზაციებს მათი დაცვის ქვეშ მყოფი მოქალაქეების კონფიდენციალური ინფორმაციას სთხოვს.

კუპრაშვილის განცხადებას "საფარის" ხელმძღვანელი ბაია პატარაია გამოეხმაურა და ანტიკორუფციული ბიუროს მიერ გამოგზავნილი დოკუმენტი გამოაქვეყნა. მისი თქმით, რაჟდენ კუპრაშვილი ცრუობს. მის მიერ გავრცელებულ დოკუმენტში წერია, რომ ბიურო არასამთავრობო ორგანიზაციას ბენეფიციარების დეტალურ ინფორმაციას სთხოვს, მათ შორის ფოტო-ვიდეო მასალას.