სასწრაფო სამედიცინო დახმარების ცენტრის განცხადებით, საავადმყოფოში კიდევ ერთი აქციის მონაწილე გადაიყვანეს, რომელსაც მსუბუქი დაზიანება აქვს, სულ — 5.

"დაემატა კიდევ ერთი პაციენტი, რომელიც გადაყვანილია კავკასიის მედიცინის ცენტრში, მსუბუქი დაზიანებებით. ინფორმაცია, თუ ვინ არის ეს დაშავებული, მე არ მაქვს", — განუცხადეს On.ge-ს სასწრაფო სამედიცინო დახმარების ცენტრში.

მათივე განცხადებით, 3 ადამიანი ღუდუშაურის კლინიკაშია გადაყვანილი, 2 კი კავკასიის მედიცინის ცენტრში.

ჩვენ დავუკავშირდით კავკასიის მედიცინის ცენტრსაც და ვკითხეთ, თუ ვინაა კონკრეტულად დაშავებული და როგორია მისი მდგომარეობა, რაზეც გვიპასუხეს, რომ ამ ეტაპზე მიმდინარეობს კვლევა და ინფორმაციას ვერ გასცემენ.

"ამ ეტაპზე ინფორმაციას ვერ გასცემს ექიმი, კვლევის პროცესში იმყოფებიან პაციენტები", — აცხადებენ კავკასიის მედიცინის ცენტრში.

მიუხედავად ამისა, მედიაში გავრცელებული ინფორმაციის თანახმად, აქციაზე დაშავდა 30-ზე მეტი ადამიანი, თუმცა არიან თუ არა ისინი გადაყვანილნი საავადმყოფოში, ჯერჯერობით უცნობია.

8 ნოემბერს ოპოზიციამ პარლამენტთან საპროტესტო აქცია გამართა, რომელზეც მთავრობას სამი მოთხოვნა წამოუყენა და დრო რვა საათამდე მისცა. ისინი ხელახალ არჩევნებს, ცესკოს თავმჯდომარის გადადგომას და პოლიტპატიმრების გათავიუფლებას ითხოვდნენ. ულტიმატუმის ვადის ამოწურვის შემდეგ ნიკა მელიამ განაცხადა, რომ მათთან კონტაქტზე მყოფმა ირაკლი კობახიძემ და არჩილ თალაკვაძემ ხვალ შეხვედრა შესთავაზეს, რასაც არ დათანხმდებოდნენ. ეს კობახიძემ უარყო და ამტკიცებდა, რომ შეხვედრა ოპოზიციამ მათ შესთავაზა და ამას მხოლოდ პარტნიორების სურვილის შემთხვევაში დათანხმდებოდნენ.

რვა საათის შემდეგ ოპოზიციამ განაცხადა, რომ ცესკოსთან გადაინაცვლებდნენ და არავის მისცემდნენ შიგნით შესვლის ან იქედან გამოსვლის უფლებას. სანამ ოპოზიიცია მსვლელობით მივიდოდა, ცესკოსთან რამდენიმე ადამიანი შეიკრიბა. ადგილზე მობილიზებული იყო პოლიცია, რომელთა რაოდენობამ იზრდებოდა. ცესკოსთან მოხდა რამდენიმე დაპირისპირებაც, თუმცა მალევე აღმოიფხვრა.

ამის შემდეგ კი ადგილზე სპეცრაზმი გამოჩნდა, რომელმაც გაფრთხილების გარეშე დაიწყო წყლის ჭავლის გამოყენება აქციის მონაწილეების წინააღდეგ. აქციაზე გაუშვეს სავარაუდოდ ცრემლსადენი გაზიც, თუმცა შსს ამას უარყოფს. რაც შეეხება წყლის ჭავლს, ამას პროპორციულ ძალად მიიჩნევს. ამ ეტაპზე არსებული ინფორმაციით, აქციის დაშლისას 2 ადამიანი დაშავდა.

უფლებადამცველები, ყოფილი და მოქმედი სახალხო დამცველები კი აცხადებენ, რომ აქციის დაშლა ამ მეთოდით არაკანონიერი იყო და არღვევდა გამოხატვის თავისუფლებას. მათივე თქმით, ეს იყო სასტიკი და არაპროპორციული ძალა.

გაიგეთ მეტი მომხდარის პოლიტიკურ შეფასებებზე: