მთავრობის მეთაურმა, ირაკლი კობახიძემ ბრიფინგზე დაადასტურა, რომ საქართველოს მიერ კონტროლირებადი ტერიტორიიდან ოკუპირებულ აფხაზეთში საწვავი შევიდა. კობახიძის განმარტებით, საწვავი "ოკუპირებული ტერიტორიების შესახებ" კანონის ფარგლებში ბიზნესმა შეიტანა.

კობახიძემ ასევე ხაზი გაუსვა, რომ მთავრობა მომავალშიც გამოიყენებს შესაძლებლობას, ამავე კანონის ფარგლებში ოკუპირებულ ტერიტორიებზე მყოფ მოსახლეობას მდგომარეობა შეუმსუბუქოს.

"ზოგადად, ასეთ რამეს უშვებს ჩვენი მოქმედი საკანონმდებლო ჩარჩო, მათ შორის კანონი ოკუპირებული ტერიტორიების შესახებ. თუ რაიმე ასეთი ნაბიჯი გადაიდგა და გადაიდგმება, ყველა ეს ნაბიჯი გადაიდგმება ოკუპაციის შესახებ კანონის ჩარჩოებში. თუ შეგვიძლია, მათ შორის აფხაზეთში მცხოვრებ მოსახლეობას შევუმსუბუქოთ მდგომარეობა, ამას გავაკეთებთ, ოღონდ — ოკუპაციის შესახებ კანონის ფარგლებში.

ჩვენ, მათ შორის, გვაქვს პროგრამა "ნაბიჯი უკეთესი მომავლისკენ", რომელიც განკუთვნილია იქ მცხოვრები მოსახლეობის — არა მხოლოდ ქართველი, არამედ აფხაზი მოსახლეობის — მხარდაჭერისთვის. თუ შეგვიძლია მდგომარეობის შემსუბუქება, გავაკეთებთ, ოღონდ ყოველთვის კანონის ჩარჩოებში.

კი [ფაქტი დადასტურებულია], ჩვენ არ შეგვიტანია, ბიზნესმა შეიტანა. გავიმეორებ: თუკი ასეთი ნაბიჯი იდგმება, იდგმება კანონის ჩარჩოებში. თუ მომავალშიც გვექნება ამის შესაძლებლობა, რომ იქ მცხოვრებ მოსახლეობას მდგომარეობა შევუმსუბუქოთ, ამას მომავალშიც გავაკეთებთ“, — განაცხადა კობახიძემ.

შეგახსენებთ, რომ უკრაინის მიერ რუსეთის ნავთობგადამამუშავებელ და სხვა ენერგეტიკულ ობიექტებზე განხორციელებული დარტყმების შედეგად, ოკუპირებულ აფხაზეთს რუსეთიდან საწვავი შეფერხებით მიეწოდება.