მართალია, ავრილ ლავინის მაკიაჟი ჯერ კიდევ 2000-იანების დასაწყისში იყო პოპულარული, თუმცა ინტერნეტში ტრენდი თავშესაფრის ფისომ ახლახან გააცოცხლა. ფისო, სახელად ავრილ ლავინი, სოციალურ ქსელების ვარსკვლავად მას შემდეგ იქცა, რაც მომხმარებლებმა შეამჩნიეს, რომ თვალების გარშემო ბუნებრივად მუქი შეფერილობა აქვს.

2 წლის მოკლებეწვიანი ფისო კანადის ცხოველთა დახმარების ცენტრში ცხოვრობდა. თავშესაფარმა 1 კვირის წინ ფისოს შესახებ შემდეგი პოსტი გამოაქვეყნა: "მართალია, ჩვენი ავრილი გიტარაზე ვერ უკრავს, თუმცა უმაგრესი ბუნებრივი ლაინერი აქვს და მზადაა, თავისი სუპერკრუტუნა ხასიათით თქვენი სამყარო თავდაყირა დააყენოს. ეს ულამაზესი გოგო ადამიანებზეა შეყვარებული და გიჟდება, როცა თავისი ფანებისგან ყურადღებას, სითბოსა და აღფრთოვანებას იღებს".

პოსტი ძალიან მალე ვირუსულად გავრცელდა და ავრილ ლავინს არაერთი მზრუნველი პოტენციური პატრონი გამოუჩნდა. ათასობით მოწონებამ, გაზიარებამ და აღფრთოვანებულმა კომენტარმა შედეგი მალევე გამოიღო. თავშესაფრის თანამშრომლებს საკმაოდ რთული, მაგრამ სასიამოვნო არჩევანის გაკეთება მოუწიათ, რათა ამ პატარა ვარსკვლავისთვის ზუსტად ისეთი გარემო შეერჩიათ, როგორსაც ითხოვდა.

თავშესაფარმა პოსტი განაახლა და დაწერა, რომ ფისო ოჯახს აღარ ეძებს, რადგან მის ცხოვრებაში ახალი თავგადასავალი დაიწყო. კომენტარებში კი სოციალური ქსელის მომხმარებლები ახალ პატრონს სთხოვენ, ფისოს სახელი არ გადაარქვას.