როგორც ბრედ პიტი აღნიშნავს, ოჯახურმა პრობლემებმა მის მენტალურ მდგომარეობაზე მძიმე კვალი დატოვა.

ოსკაროსანმა მსახიობმა, რომელიც წლებია ყოფილ მეუღლესთან, ანჯელინა ჯოლისთან სასამართლო დავებშია ჩართული, საკუთარ მენტალურ ჯანმრთელობაზე ისაუბრა:

"არასდროს მქონია სუიციდური ფიქრები, გარდა ერთი პატარა მონაკვეთისა. აი, იმ ერთადერთ პერიოდში კი უბრალოდ ვერ ვხედავდი გამოსავალს," — თქვა პიტმა. — "ტკივილი იმდენად გაუსაძლისი და მძიმე იყო, რომ — თუმცა ამის გაკეთებას არ ვაპირებდი — თავში ტყვიის ცივ ფოლადს ვგრძნობდი და ეს შვებად მეჩვენებოდა. მაშინ გავიფიქრე: 'გასაგებია, ახლა მესმის'. მივხვდი, რას ნიშნავს სუიციდი — ეს არის უბრალოდ ტკივილისგან შვების ძიება. თუმცა, იმასაც ვფიქრობ, რომ გადარჩენის წარმოუდგენლად ძლიერი ინსტინქტი გვაქვს. ჩემს შემთხვევაში ეს ინსტინქტი მომენტალურად ჩაირთო."

პიტმა და ჯოლიმ განქორწინებაზე განაცხადი 2016 წლის სექტემბერში, ორწლიანი ქორწინების შემდეგ შეიტანეს. წყვილმა განქორწინების პროცესი 2024 წლის დეკემბერში დაასრულა.

დაშორებიდან გასული ათი წლის განმავლობაში, ყოფილი წყვილი მრავალ სასამართლო პროცესში იყო ჩართული. Château Miraval-ის ირგვლივ დაწყებულ დავას ჯოლის მხრიდან პიტის ფიზიკური ძალადობის ბრალდებები მოჰყვა.

• ბრედ პიტმა ანჯელინა კედელს მიანარცხა და შვილს გაარტყა — ანჯელინას ადვოკატი

ამ განხეთქილებამ, როგორც ჩანს, პიტისა და მისი შვილების ურთიერთობაზეც სერიოზულად იმოქმედა. ბოლო ორი წლის განმავლობაში, ანჯელინასა და ბრედის ზოგიერთმა შვილმა პიტის გვარზე უარი თქვა.

• ბრედ პიტისა და ანჯელინა ჯოლის კიდევ ორმა შვილმა მამის გვარზე უარის თქმა გადაწყვიტა

პიტის თქმით, ოჯახურმა ამბებმა დიდი როლი ითამაშა მისი მენტალური მდგომარეობის გაუარესებაში.

2022 წლის ოქტომბერში სასამართლოში შეტანილ სარჩელში ჯოლი პიტს ადანაშაულებდა მასზე და ორ შვილზე ძალადობაში, რაც, მისი თქმით, 2016 წელს, საფრანგეთიდან ლოს-ანჯელესში კერძო თვითმფრინავით ფრენისას მოხდა. მოგვიანებით წარდგენილ დოკუმენტებში ჯოლი ამტკიცებდა, რომ პიტის მხრიდან მასზე ძალადობა თვითმფრინავის ინციდენტამდე დიდი ხნით ადრე დაიწყო, თუმცა ბავშვები ამის მსხვერპლნი პირველად სწორედ თვითმფრინავში გახდნენ.

პიტმა ბრალდებები უარყო, ინციდენტის შესწავლის შემდეგ კი, გამოძიების ფედერალურმა ბიურომ გამოძიების დაწყებასა და ბრალის წაყენებაზე უარი თქვა.

პიტმა ასევე აღნიშნა, რომ ჯოლისთან დაშორების შემდეგ სიფხიზლის პერიოდი ჰქონდა და ანონიმურ ალკოჰოლიკთა შეხვედრებს ესწრებოდა, თუმცა ახლა ალკოჰოლს ზომიერად იღებს: "7 წელი საერთოდ არ ვსვამდი. მერე ისევ გადავუხვიე გზას, თუმცა, გაცილებით თავშეკავებულად. რამდენჯერმე ზედმეტი მომივიდა და თავადვე ვთქვი: 'არა, ეს ჩემთვის კარგი არ არის'".