ქართული ოცნების ლიდერი მამუკა მდინარაძე მოუწოდებს აქციის მონაწილეებს, რომ არ გაცდნენ მშვიდობიანი გამოხატვის ფორმას, ან მათ წინააღმდეგ გამოყენებული იქნება "პროპორციული ძალა".

"ვუერთდებით ჩვენი ამერიკელი და ევროპელი პარტნიორების მოწოდებას და ჩვენც, კატეგორიულად მოვუწოდებთ აქციის ორგანიზატორებს და მონაწილეებს, დაიცვან რეგულაციები, ასევე არ გასცდნენ პროტესტის მშვიდობიანი გამოხატვის ფორმებს. წინააღმდეგ შემთხვევაში, სახელმწიფო ყველა კანონდარღვევას უპასუხებს პროპორციულად და არ დაუშვებს მათი მხრიდან კანონის ჩარჩოებიდან გასვლის ნებისმიერ პრეცედენტს და ასეთ მცდელობებს", — განაცხადა მან.

ქართული ოცნების ლიდერი, მამუკა მდინარაძე ამტკიცებს, რომ პოლიციამ ვერ შეძლო აქციის დაშლის შესახებ მოქალაქეების გაფრთხილება, რადგან ამ დროს ისინი ესროდნენ ქვებს. მისი მტკიცებით, ასეთ დროს გაფრთხილება მსოფლიოს განვითარებულ ქვეყნებშიც არ ხდება.

"ქვებს ესვრიან პოლიციელებს, ასეთ დროს მსოფლიოს არცერთ განვითარებულ ქვეყანაში გაფრთხილება ვერც ესწრება და არც ხდება. როდესაც თქვენ თავს დამესხმებით, ამ შემთხვევაში მე გაფრთხილებას ვერ დავიწყებ, ეს არის მარტივი იურიდიული კაზუსი. ვერ დავიწყებ გაფრთხილებას და ამის შემდეგ მოქმედებას. გაფრთხილება ხდება, როდესაც არის დაშლის წინაპირობა ყველანაირი, თუმცა მყისიერი თავდასხმა არ არის. ამ შემთხვევაში უნდა გააფრთხილო. თავდასხმის დროს გაფრთხილება ვერ ხდება და ვერ მოხდება ვერსად", — განაცხადა მან.

არასამთავრობო ორგანიზაციები, ყოფილი და მოქმედი უფლებადამცველები კი აკრიტიკებენ შსს-ს აქციის დაშლის გამო და აცხადებდნენ, რომ არაპროპორციული ძალა იყო გამოყენებული.

ცესკოსთან შეკრებილები პოლიციამ გაფრთხილების გარეშე წყლის ჭავლით დაშალა.