"ჩვენი ერთიანობით, სტრატეგიული მოთმინებით, სიბრძნითა და შრომით ჩვენი სამშობლო აუცილებლად მიაღწევს თავის დიდგორს — გაერთიანებულ, მშვიდობიან და ძლიერ საქართველოს", — აღნიშნა მიხეილ ყაველაშვილმა დიდგორობისადმი მიძღვნილ ღონისძიებაზე სიტყვით გამოსვლისას.

ყაველაშვილმა თავის გამოსვლაში ხაზი გაუსვა 1121 წლის 12 აგვისტოს გამარჯვების მნიშვნელობას და დიდგორის ბრძოლას ეროვნული ღირსების, მხედრული სულისა და სახელმწიფოებრივი სიძლიერის გამორჩეული გამოვლინება უწოდა. მისი თქმით, ეს არ ყოფილა შემთხვევითი წარმატება — დიდგორი ხანგრძლივი მზადების, შორსმჭვრეტელი დაგეგმარების, დისციპლინისა და სახელმწიფოებრივი აზროვნების შედეგია.

ყაველაშვილის განცხადებით, დიდგორის ბრძოლა უპირველეს ყოვლისა საკუთარ თავსა და სისუსტეებზე გამარჯვებას ნიშნავს:

"დიდგორი უპირველესად არის საკუთარი თავისა და ხასიათის სისუსტეების დაძლევა. ეს არის სამაგალითო ნიმუში იმისა, თუ როგორ უნდა წარმართოს ღირსეულმა სახელმწიფომ პოლიტიკა და საზოგადოებრივი ცხოვრება ისე, რომ ერმა აჯობოს საკუთარ თავს და მიაღწიოს ისტორიულ გამარჯვებებს", — განაცხადა საქართველოს პრეზიდენტმა.