11 აგვისტოს, კოლუმბიის დასავლეთით მომხდარ 7.4 მაგნიტუდის სიმძლავრის მიწისძვრას 224 ადამიანი ემსხვერპლა, 1 000-ზე მეტი დაშავდა, ხოლო 3 000-მდე ადამიანი ჯერ კიდევ დაკარგულად ითვლება.

მიწისძვრა დილის 07:34 საათზე მოხდა. მისი ეპიცენტრი ჩოკოს პროვინციაში, 96 კილომეტრის სიღრმეზე დაფიქსირდა.

ქვეყნის პრეზიდენტმა დელა ესპრიელამ, რომელმაც თანამდებობა რამდენიმე დღის წინ დაიკავა, ეროვნული კატასტროფის მდგომარეობა გამოაცხადა.

ერთ-ერთ ყველაზე დაზარალებულ ქალაქ კალიში 5-სართულიანი საცხოვრებელი სახლი მთლიანად ჩამოინგრა. მაშველები და ადგილობრივები რამდენიმე საათის განმავლობაში თხრიდნენ ნანგრევებს, სადაც 6 თვის ჩვილი იპოვეს.

როდესაც კალიში მიწისძვრა დაიწყო, ბრაიან ოსორიო სულუაგა სამსახურში იმყოფებოდა. მას შემდეგ, რაც ბებიასთან დაკავშირება სცადა, მოტოციკლით სახლისკენ გაემართა. ადგილზე მისულმა ნანგრევებს შორის ყვირილი დაიწყო, რათა გაერკვია, იყო თუ არა ვინმე შიგნით გაჭედილი.

როგორც თავად აღნიშნავს, ჩურჩულის ხმა შემოესმა, შემდეგ კი დახმარება სხვებსაც სთხოვა. სწორედ ასე გადაარჩინეს 6 თვის პატარა.

"ჩვილის თავი მოჩანდა, ოდნავ იისფერი იყო, რადგან ვერ სუნთქავდა," — იხსენებს ოსორიო — "როგორც კი ნანგრევების მოშორება დავიწყეთ, ბავშვმა სუნთქვა დაიწყო და კანის ფერიც დაუბრუნდა".

ნახეთ ვიდეო:

ამავე ქალაქში, მეხანძრე-მაშველები 16-24 საათის განმავლობაში უწყვეტად ატარებდნენ რთულ სამაშველო ოპერაციას, რის შედეგადაც 35 წლის კაცი და 31 წლის ქალიც იხსნეს ნანგრევებიდან.

რიზარალდას პროვინციის დედაქალაქ პერეირაში, სულ მცირე, 60 ადამიანის დაღუპვა დადასტურდა. სტიქიამ 165 შენობა სრულად გაანადგურა, 1 500-ზე მეტი კი დააზიანა. კალის საავადმყოფოში ჩამოინგრა პედიატრიული და ახალშობილთა განყოფილებები.

ფოტო: Getty Images

ხელისუფლებამ 5 პროვინციის დედაქალაქში სამედიცინო მომსახურების მხრივ განგაშის წითელი დონე გამოაცხადა, ქალაქ კალიში კი კომენდანტის საათი დაწესდა. ადგილობრივი სამართლის სტუდენტის, კუესტას თქმით, პანიკაში ჩავარდნილი მოსახლეობის ნაწილი სახლებიდან შიშველი გარბოდა, ზოგიერთი კი მეორე სართულის ფანჯრებიდან ხტებოდა.