ქართული ოცნების აღმასრულებელი მდივნის, ირაკლი კობახიძის განცხადებით, თუ საერთაშორისო პარტნიორებს ექნებათ სურვილი, რომ ოპოზიციისა და მმართველი გუნდის შეხვედრა შედგეს, მათ ანგარიშს გაუწევენ.

"რაც შეეხება ქართული ოცნების თხოვნას რაიმე შეხვედრასთან დაკავშირებით, დღეს, ხვალ ან ზეგ, თუ მაზეგ, ეს არის ტყუილი. ჩვენ განვმარტეთ რაში იყო საქმე, საერთაშორისო პარტნიორებს თუ ექნებათ სურვილი, რომ შედგეს ასეთი შეხვედრა ჩვენ, რა თქმა უნდა, გავუწევთ ანგარიშს და შეიძლება, ნებისმიერი შეხვედრა შედგეს.

პირველ რიგში, ჩვენ ვიქნებით დამოკიდებული, რა თქმა უნდა, ჩვენი საერთაშორისო პარტნიორების პოზიციაზე და მეორე განმსაზღვრელი იქნება, რა თქმა უნდა, ის, თუ რას უნდა შეეხოს ეს შეხვედრა. საკითხები, რომელიც დადგება ამ შეხვედრაზე უნდა იყოს განხილვადი და სერიოზული", — განაცხადა მან.

ულტიმატუმის ვადის ამოწურვის შემდეგ პარლამენტთან მიმდინარე აქციაზე ენმ-ის ლიდერმა, ნიკა მელიამ განაცხადა, რომ რუსთაველზე შეკრებილებმა უნდა გადაინაცვლონ, იქ დარჩნენ და კომენდანტის საათი დაუწესონ ცესკოს. ამ წუთებში მსვლელობა მიმდინარეობს. მელიამ აღნიშნა ისიც, რომ ულტიმატუმის წაყენების შემდეგ მათთან კონტაქტზე არჩილ თალაკვაძე და ირაკლი კობახიძე გავიდნენ და ხვალ შეხვედრა შესთავაზეს. მელიას თქმით, არ აპირებენ, ჰიპოთეტურ შეთავაზებას დათანხმდნენ და ხელისუფლება ვალდებულია, რომ მათ დღესვე შეხვდეს.

ოპოზიციურ პარტიებს სამი მოთხოვნა ჰქონდათ და ხელისუფლებას დრო რვა საათამდე მისცეს. ესენია:

  1. ხელახალი, თავისუფალი და სამართლიანი არჩევნები;
  2. თამარ ჟვანია უნდა გადადგეს და კომისიები უნდა დაკომპლექტდეს სამართლიანი წესით;
  3. ყველა პოლიტპატიმარი უნდა იყოს გამოშვებული.

მათ პასუხად, მმართველ გუნდში განაცხადეს, რომ მოთხოვნები აბსურდულია და სერიოზულად არ აღიქვამენ.

ამ წუთებში ოპოზიცია პარლამენტიდან ცესკოსკენ დაიძრა. მანამდე, 5 საათის განმავლობაში პარლამენტის წინ წარსულში ერთმანეთთან დაპირისპირებული ოპოზიციური პარტიები საერთო აქციას მართავდნენ და არჩევნების შედეგებს აპროტესტებდნენ.

ოპოზიციური პარტიები არჩევნების შედეგებს არ აღიარებენ და არალეგიტიმურად ცნობენ. ყველა ბარიერგადალახულმა პარტიამ უარი თქვა მეორე ტურში მონაწილეობასა და პარტლამენტის მანდატებზე.

არჩევნების შემდეგ, როცა ოპოზიციამ აქციები დაანონსა, სამთავრობო გუნდი და საკოორდინაციო საბჭოს წევრები უფრო მკაცრად აცხადებენ, რომ აქციები ვირუსის გავრცელების საფრთხეს შეიცავს და მოუწოდებენ მოქალაქეებსა და პოლიტიკურ ლიდერებს დაიცვან წესები.