სირიის სასამართლომ ქვეყნის დხამხობილ პრეზიდენტს, ბაშარ ასადსა და მის უმცროს ძმას, მაჰერ ასადს დაუსწრებლად სიკვდილით დასჯა მიუსაჯა. მათ ბრალი კაცობრიობის წინააღმდეგ ჩადენილ და ომის დანაშაულებში ედებათ, რასაც 14-წლიანი კონფლიქტის განმავლობაში ნახევარ მილიონამდე ადამიანის სიცოცხლე ემსხვერპლა. ინფორმაციას CNN ავრცელებს.

დამასკოს მეოთხე სისხლის სამართლის სასამართლოს მიერ გამოტანილი განაჩენი პირველი განაცენია ასადისა და მისი უახლოესი გარემოცვის წინააღმდეგ მას შემდეგ, რაც ასადების ოჯახის 50-წლიანი მმართველობა 20 თვის წინ დასრულდა.

"ბაშარ ასადი იყენებდა სახელმწიფო უწყებებს ომის დანაშაულებისა და კაცობრიობის წინააღმდეგ მიმართული დანაშაულების ჩასადენად",— განაცხადა მოსამართლე ფახარედინ ალ-არიანმა სხდომაზე, რომელიც პირდაპირ ეთერში გადაიცემოდა.

იმავე საქმეზე სიკვდილით დასჯა მიესაჯა ატეფ ნაჯიბსაც — დარას პროვინციის პოლიტიკური უსაფრთხოების ყოფილ უფროსს. სწორედ ნაჯიბმა უხელმძღვანელა 2011 წელს იმ რეპრესიებსა და მოზარდების წამებას სკოლის კედელზე გაკეთებული წარწერების გამო, რამაც მასობრივი პროტესტი და საბოლოოდ სამოქალაქო ომი გამოიწვია. იგი დაკავებულია და განაჩენის გამოცხადებას პატიმრისთვის განკუთვნილი ადგილიდასნ ადევნებდა თვალს.

ასევე, მაჰერ ასადი სირიის სამხედრო ძალების მე-4 ჯავშანსატანკო დივიზიის ყოფილი მეთაურია, რომელსაც ოპოზიცია მკვლელობებში, წამებაში, გამოძალვასა და ნარკოვაჭრობაში ადანაშაულებს.

შეგახსენებთ, 2024 წლის დეკემბერში, რეჟიმის დაცემის შემდეგ, ბაშარ და მაჰერ ასადები რუსეთში გაიქცნენ, სადაც პოლიტიკური თავშესაფარი მიიღეს. სირიის ახალმა ხელისუფლებამ მოსკოვს მათი გადმოცემის მოთხოვნით უკვე მიმართა.