საერთაშორისო გამჭვირვალობა — საქართველო ბოლო პერიოდში გამოკითხვაზე ჟურნალისტების დაბარების გახშირებულ ფაქტებს ეხმაურება და აცხადებს, რომ სამართალდამცავების მიერ ჟურნალისტებისთვის წყაროს ვინაობის გამხელის მოთხოვნა მედიის საქმიანობას ხელს უშლის.

განცხადების მიხედვით, ერთი და იგივე მოტივით გამოკითხვაზე ჟურნალისტების დაბარების ფაქტები ეწინააღმდეგება როგორც ადგილობრივ, ასევე საერთაშორისო სტანდარტებს.

მაგალითად TI-ის თამარ ბაჩალიაშვილის საქმეზე ფორმულას ჟურნალისტ დავით ქაშიაშვილის და შაქარაშვილის საქმეზე მთავარი არხის დირექტორის, ნიკა გვარამიას გამოკითხვაზე დაბარება მოჰყავს. ასევე, TI აღნიშნავს, რომ წყაროს შესახებ კითხვები ჰქონდათ "მთავარი არხის" წამყვანის გიორგი გაბუნიას შესაძლო მკვლელობის შესახებ მომზადებული სიუჟეტისთვის TV პირველის ჟურნალისტებთან, ნოდარ მელაძესა და მაკა ჩიხლაძესთან.

"ევროპის საბჭოს მინისტრთა კომიტეტის რეკომენდაციის თანახმად, ჟურნალისტების ინფორმაციის წყაროების დაცვა წარმოადგენს მნიშვნელოვან პირობას ჟურნალისტური მუშაობისთვის და თავისუფლებისთვის. საქართველოს სისხლის სამართლის საპროცესო კოდექსის მიხედვით, ჟურნალისტი არ არის ვალდებული, იყოს მოწმე პროფესიული საქმიანობისას მიღებულ ინფორმაციასთან დაკავშირებით. შესაბამისად, ჟურნალისტს წყაროს გამჟღავნების ვალდებულება არ აქვს", — ნათქვამია განცხადებაში.

TI-ის განმარტებით, გამოკითხვაზე ჟურნალისტების გახშირებული დაბარება თვითცენზურის დამკვიდრების საფრთხეს შეიცავს, რის შედეგად მედიის წარმომადგენლებმა შესაძლოა სამომავლოდ თავი აარიდონ მნიშვნელოვან თემებზე მუშაობას. ასევე, წყაროს იდენტიფიცირების მიმართ გამოძიების მომეტებული ინტერესი საშიშროებას აჩენს, რომ წყაროებმა სამომავლოდ ჟურნალისტებთან აღარ ითანამშრომლონ.

საერთაშორისო გამჭვირვალობა — საქართველო მოუწოდებს სამართალდამცავ უწყებებს, მისცენ მედიას პროფესიული მოვალეობის თავისუფლად შესრულების საშუალება.