ქველმოქმედება კარგია, მაგრამ საჭიროა რეკომენდაციების გათვალისწინება

ჯანდაცვის მინისტრის, ეკატერინე ტიკარაძის თქმით, კორონავირუსი გლობალური გამოწვევაა და მისი პოლიტიკური მიზნებისთვის გამოყენება არასწორია. მისივე თქმით, ქველმოქმედება კარგია, მაგრამ აუციელებელია რეკომენდაციების გათვალისწინება. ასე გამოეხმაურა ის ექსპრეზიდენტის, მიხეილ სააკაშვილის ინიციატივით, ზუგდიდში პირბადეების დარიგებას, სადაც ათეულობით ადამიანი იყო შეკრებილი.

"ეს უქმნის გარკვეულ პრობლემას და საფრთხეს იმ ადამაინებს, რომლებზეც სახელმწიფო ისეც ზრუნავს", — განაცხადა მან.

მანვე აღნიშნა, რომ ნახა ვიდეოჩართვა ზუგდიდიდან და სურს მოსახლეობა დაამშვიდოს:

"სახელმწიფო ზრუნავს მათზეც. ეს ზრუნვა პირბადეების გარდა გამოიხატება იმაში, რომ რამდენიმე დღეა მიმდინარეობს ფოთის საავადმყოფოს მობილიზაცია, რომელსაც რამდენიმე დღეში მე თვითონ ადგილზე ვნახავ.

ზუგდიდიც და სამეგრელოც, ისევე, როგორც აფხაზეთი არის ის მხარე, რომელზეც სახელმწიფო ზრუნავს თანაბრად, როგორც სხვა მოქალაქეებზე", — განაცხადა მან.

დღეს, 26 მარტს ზუგდიდში სააკაშვილის ინციიატივით, საპრეზიდენტო ბიბლიოთეკამ შეკრებილ მოქალაქეებს პირბადეები, ხელთათმანები და სადეზინფექციო ხსნარები დაურიგა, რასაც ხალმხრავლობა მოყვა და კრიტიკა გამოიწვია, რადგან კორონავირუსის პრევენციისთვის ქვეყანაში აკრძალულია 10-ზე მეტი ადამიანის შეკრება.

On.ge-ს ნაციონალურ მოძრაობაში განუცხადეს, რომ ზუგდიდში ხალხის შეკრება, პარტიის დაორგანიზებული არ იყო და ის სააკაშვილის საპრეზიდენტო ბიბლიოთეკის პროგრამაა.

საგანგებო მდგომარეობის გამოცხადებამდეც, მთავრობას კორონავირუსის პრევენციისთვის დაწესებული ჰქონდა არაერთი შეზღუდვა. კერძოდ:

მუშაობა შეწყვიტა ყველა სავაჭრო ობიექტმა სასურსათო მაღაზიების, სააფთიაქო და საფოსტო ქსელების, ბენზინგასამართი სადგურებისა და ბანკების გარდა;
აიკრძალა სამარშრუტო ტაქსების გადაადგილება;
საზღვარი დაკეტილია ყველა უცხო ქვეყნის მოქალაქისთვის;
საჰაერო მიმოსვლა შეწყდა ყველა კომპანიისთვის საქართველოს ავიახაზების გარდა;
ყველას, ვინც საქართველოს საზღვარს გადმოკვეთს, კარანტინში გაუშვებენ;
საჯარო დაწესებულებების ნაწილმა, მათ შორის, შსს-ს მომსახურების სააგენტომ და იუსტიციის სახლმა მომსახურებები შეზღუდა;

გარდა ამისა, როგორც კერძო, ისე საჯარო სექტორს მიცემული აქვს რეკომენდაცია დისტანციურ მუშაობაზე. 70 წელზე ზევით მოხუცებს კი თვითიზოლაცია ურჩიეს.

მას შემდეგ, რაც გაირკვა, რომ მარნეულში ინფიცირებულ პირს, ათეულობით ადამიანთან ჰქონდა კონტაქტი, საკოორდინაციო უწყებათაშორისი საბჭოს გადაწყვეტილებით, მარნეულისა და ბოლნისის რაიონებში მკაცრი საკარანტინო რეჟიმი გამოცხადდა. ჩაიკეტა ორივე რაიონის შესასვლელი, რომელსაც სამხედროები და შსს-ს თანამშრომლები აკონტროლებენ. ასევე, გაიშალა საველე ჰოსპიტლები.

ჯანდაცვის სამინისტროს დაევალა, მარნეულსა და ბოლნისში დაიწყოს ტესტირების სპეციალური პროგრამა.

გარდა ამისა, მთავრობის გადაწყვეტილებით, საქალაქთაშორისო გადაადგილება აიკრძალა ყველა სახის ტრანსპორტით, გარდა პირადი ავტომობილებისა. თბილისის მერიის გადაწყვეტილებით კი შეზღუდვები დაწესდა ტაქსებზე. კერძოდ, მხოლოდ 2 მგზავრის გადაყვანა შეიძლება უკანა სავარძლებზე და ფანჯრები უნდა იყოს ღია.

23 მარტს ცნობილი გახდა, რომ მთავრობის განკარგულებით, საქართველოს ავიახაზები 2 კვირის განმავლობაში მსოფლიოს 6 ქალაქიდან ჩამოიყვანს მგზავრებს. მთავრობის მოთხოვნით, ბილეთის ფასი არ უნდა აღემატებოდეს €199-ს.