ამერიკის შეერთებული შტატები უკრაინას 180 მილიონი აშშ დოლარის ღირებულების საჰაერო თავდაცვის აღჭურვილობას გადასცემს. ინფორმაციას "Ukrainska Pravda" აშშ-ის თავდაცვის უსაფრთხოების თანამშრომლობის სააგენტოზე დაყრდნობით ავრცელებს.

მათივე ცნობით, პაკეტი არ მოიცავს საჰაერო თავდაცვის ძირითად სისტემებს. სააგენტო აცხადებს, რომ აშშ უკრაინას უზრუნველყოფს:

  • მოდიფიკაციებითა და მოვლა-პატრონობით;
  • სათადარიგო ნაწილებით;
  • სახარჯი მასალებითა და აქსესუარებით;
  • შეკეთებისა და დაბრუნების მხარდაჭერით;
  • პერსონალის მომზადებისა და წვრთნის აღჭურვილობით;
  • საინჟინრო, ტექნიკური და ლოჯისტიკური მომსახურებით აშშ-ის მთავრობისა და
  • კონტრაქტორებისგან;
  • და სხვა დაკავშირებული ლოჯისტიკური და პროგრამული მხარდაჭერის ელემენტებით.

აშშ-ის თავდაცვის უსაფრთხოების თანამშრომლობის სააგენტომ არ დააკონკრეტა, თუ ვინ დაფარავს უკრაინისთვის 180 მილიონი დოლარის ღირებულების საჰაერო თავდაცვის აღჭურვილობის გადაცემის ხარჯებს.

ცნობისთვის, 23 ივლისს, აშშ-ის სახელმწიფო დეპარტამენტმა უკრაინისთვის სამხედრო დახმარების ორი პაკეტი დაამტკიცა. პირველი პაკეტი მოიცავს HAWK III ფაზის საჰაერო თავდაცვის სისტემებს და მათ მოვლა-პატრონობას, ხოლო მეორე — Bradley-ის ქვეითთა საბრძოლო მანქანებს და მათ შეკეთებას.