"დახურეს პროექტი "საინტერესო ადამიანები", რომელმაც ბოლო წლებში ბევრი სიხარული მომიტანა. რა თქმა უნდა, ეს გადაწყვეტილება მოულოდნელი არ ყოფილა, რადგან მას ჩემი არჩევანის, ჩემი პასუხისმგებლობის ბუნებრივ შედეგად აღვიქვამ," — ამის შესახებ ჟურნალისტი ია ანთაძე სოციალურ ქსელში წერს და აცხადებს, რომ "პირველ არხთან" მისი თანამშრომლობა დასრულდა.

მისივე თქმით, აქამდე ხელშეკრულებით საზოგადოებრივი აქტიურობა შეზღუდული ჰქონდა და პირობას პატიოსნად ასრულებდა. ახლა კი იტყვის ყველაფერს, რასაც მნიშვნელოვნად ჩათვლის.

"გუშინ დასრულდა ჩემი თანამშრომლობა საქართველოს პირველ არხთან — დახურეს პროექტი "საინტერესო ადამიანები", რომელმაც ბოლო წლებში ბევრი სიხარული მომიტანა.
რა თქმა უნდა, ეს გადაწყვეტილება მოულოდნელი არ ყოფილა, რადგან მას ჩემი არჩევანის, ჩემი პასუხისმგებლობის ბუნებრივ შედეგად აღვიქვამ.

უზომოდ მადლობელი ვარ იმ 302 ადამიანის, ვინც ინტერვიუზე დამთანხმდა და ვისთან ერთადაც თანამედროვე საქართველოს ძალიან დასამახსოვრებელი სურათი შევქმენით. ასევე, მადლობელი ვარ ყველა მკითხველის — თქვენ აცოცხლეთ ეს პროექტი 7.5 წლის განმავლობაში. ზოგჯერ მქონდა განცდა, რომ მარტო ვარ, მაგრამ, სინამდვილეში, ყოველთვის ერთად ვიყავით — ჩემი სტუმრები, ჩემი მკითხველები და მე. გულწრფელი მადლობა ამ წლებისთვის!

აქამდე ხელშეკრულებით მქონდა შეზღუდული საზოგადოებრივი აქტიურობა და პირობას პატიოსნად ვიცავდი. ახლა სრულიად თავისუფალი ვარ და შევეცდები, გზადაგზა ყველა მოსაზრება გაგიზიაროთ, რასაც მნიშვნელოვნად ჩავთვლი. იმედს ვიტოვებ, უფრო სწორად, დარწმუნებული ვარ, რომ კიდევ შევძლებ, სასარგებლო ვიყო ჩვენი საერთო სამშობლოსთვის!," — წერს ია ანთაძე.