კონცერტებზე გავრცელებული ტრადიციაა ფანების მიერ მუსიკოსებისთვის სცენაზე დროშების გადაცემა — იქნება ეს ეროვნული სიმბოლო, კონკრეტული მოძრაობისა თუ ორგანიზაციის ნიშანი. ბევრი მუსიკოსი ამ ჟესტს პატივისცემით ხვდება და მას საკუთარ მხარდამჭერებთან კავშირის გაღრმავების საშუალებად იყენებს.

მსგავსი ქმედებები არამხოლოდ კონცერტის განსაკუთრებულ მომენტად იქცევა, არამედ გულშემატკივრების მიერაც ძლიერ ემოციურ სიგნალად აღიქმება. დროშის სიმბოლოს პატივისცემა ხშირად არტისტის ღირებულებებისა და თანადგომის ნიშნად მიიჩნევა.

წარმოგიდგენთ 6 მუსიკოსს, რომელმაც დროშა მსმენელის პატივსაცემად ან ძლიერი გზავნილის გასაგზავნად გამოიყენა:

Aurora

ფოტო: Tbilisi Open Air

მომღერალი Aurora საქართველოში 2024 წელს, Tbilisi Open Air-ის ფარგლებში ჩამოვიდა და ქართველ მსმენელს ემოციური, ენერგიული და პატივისცემით აღსავსე შესრულება შესთავაზა.

მომღერალმა კონცერტის დროს არაერთხელ აღნიშნა, თუ როგორ მოეწონა საქართველო, ქართული კულტურა და ქართველები. ერთ მომენტში მსმენელის მიერ სცენაზე მისთვის მიწოდებული დროშაც აიღო და შემოიხვია, შესრულების ბოლომდე კი ჩვენი ქვეყნის დროშა ეკეთა.

“თქვენ ძალიან ძლიერი ქვეყანა ხართ. ვიცი, რომ ხალხი ქუჩაში აპროტესტებს და იბრძვის რისთვისაც სჯერა. დამპირდით, რომ არასდროს შეწყვეტთ თქვენი ხმის გამოყენებას," – მიმართა მუსიკოსმა აუდიტორიას.

ფოტო: Getty Images

M.I.A.

Tbilisi Open Air-ზე საქართველოს დროშა ცნობილმა რეპერმა, M.I.A.-მაც ამართა — ხუთჯვრიანი დროშა მას სცენაზე სწორედ მსმენელმა მიაწოდა.

ჰარი სტაილსი

ფოტო: Getty Images

ჰარი სტაილსმა 2022 წელს Madison Square Garden-ზე გამართულ კონცერტზე მსმენელის მიერ მიწოდებული უკრაინის დროშა აიღო, თავს დაიხვია და სიმღერა Sign of the Times უკრაინას მიუძღვნა.

Imagine Dragons

ამერიკული ჯგუფი Imagine Dragons ცნობილია აუდიტორიასთან ურთიერთობითა და სოციალურ საკითხებზე კომენტარების გაკეთებით.

2023 წელს ბენდი საქართველოშიც იყო ჩამოსული, სადაც ვოკალისტმა, დენ რეინოლდსმა, საქართველოსა და უკრაინის დროშები გაშალა. დენ რეინოლდსი უკრაინის დროშით თითქმის ყველა კონცერტზე გამოდის და ქვეყნის თავისუფლებისთვის ბრძოლას ხმამაღლა უჭერს მხარს.

დენ რეინოლდსი პორტუგალიაში, 2025 წლის 25 ივნისი

დენ რეინოლდსი პორტუგალიაში, 2025 წლის 25 ივნისი

ფოტო: Getty Images

აღსანიშნავია, რომ ამ კონცერტზე Starring Georgia-ს, საქართველოს ბიუჯეტიდან დაფინანსებული კომპანიის, დაცვის სამსახურმა დამსწრეებს უკრაინისა და საქართველოს დროშების კონცერტზე შეტანის უფლება არ მისცა.

ბილი აილიში

ფოტო: Pinterest

უკრაინის მიმართ მხარდაჭერას ბილი აილიშიც ხმამაღლა აფიქსირებს. ერთ-ერთ კონცერტზე მსმენელის მიერ მიწოდებული უკრაინის დროშა ბილიმაც დაიჭირა და სიმღერები ლურჯ-ყვითელი დროშით შეასრულა.

Kneecap

ფოტო: Getty Images

ირლანდიური ჰიპ-ჰოპ ჯგუფი Kneecap თავიანთ შესრულებებს ყოველთვის პალესტინის დროშების ფონზე მართავს. ჯგუფის წევრები პალესტინისა და ირლანდიის დროშების აღმართვისკენ თავიანთ მსმენელს აქტიურად მოუწოდებენ. მათი თქმით, ირლანდიასა და პალესტინას მსგავსი ისტორია აქვთ — პალესტინა იმ გზას გადის, რაც ირლანდიამ ბრიტანეთის მმართველობის ქვეშ გაიარა.

იხილეთ ასევე: