საზოგადოებრივმა მაუწყებელმა დახურა გადაცემაც — "ამ შაბათ-კვირას". ამის შესახებ Mediachecker-ს გადაცემის პროდიუსერმა, თამარ ჭინჭარაულმა განუცხადა. Mediachecker-ის ცნობით, გუნდის წევრებისთვის გაგზავნილ შეტყობინებაში ნათქვამია, რომ გადაცემას საპროექტო ვადა 1 აგვისტოს ეწურება და მისი გაგრძელება აღარ იგეგმება.

"ამ შაბათ-კვირას" პროდიუსერის, თამარ ჭინჭარაულის თქმით, მას გადასვლა რადიოს გადაცემებზე შესთავაზეს, უარის თქმის შემთხვევაში კი, მიუთითეს, რომ მასთან ხელშეკრულება 1 აგვისტოდან შეწყდებოდა. როგორც ჭინჭარაული აღნიშნავს, შეთავაზებაზე უარი მასთან ერთად უკვე თქვეს გუნდის სხვა წევრებმაც: მარიამ ფირცხალავამ, ნია ბარაბაძემ და ანა აბაკელიამ.

მეტი საზოგადოებრივი მაუწყებლის შესახებ:

"პირველ არხზე" დაიხურა გადაცემაც —"რეალური სივრცე". გადაცემის დახურვის შესახებ საზოგადოებრივმა მაუწყებელმა თანამშრომლებს 30 აპრილს წერილობით აცნობა. მანამდე, 11 აპრილს, არხიდან სარედაქციო პოლიტიკის კრიტიკის გამო გაათავისუფლეს გადაცემის წამყვანი, ნინო ზაუტაშვილი და საინფორმაციო გამოშვება "მოამბის" წამყვანი ვასილ ივანოვ-ჩიქოვანი. ამავე მიზეზით, დისციპლინური სანქციები დაუწესდა საზმაუს 4 თანამშრომელს: "რეალური სივრცის" ჟურნალისტ თამარ მშვენიერაძეს, ამავე გადაცემის წამყვან სოსო კაციტაძეს, პულტის რეჟისორ კახა მელიქიძეს და ბრენდინგისა და პრომოციის ჯგუფის რეჟისორ ირმა ჩუბინიძეს.

ამის შემდეგ, საზოგადოებრივი მაუწყებლის ხელმძღვანელობამ "რეპუტაციული ზიანის მიყენების" საფუძველზე 3 თანამშრომელს მისცა გაფრთხილება. ესენი არიან: გადაცემა "რეალური სივრცის" რედაქტორი ტუხა კვინიკაძე, "შაბათ-კვირის შოუს" კორესპონდენტი ანა აბაკელია და "შაბათ-კვირის შოუს" აღმასრულებელ პროდიუსერი თამარ ჯინჭარაული. სამივე მათგანის დისციპლინარული სანქციის ბრძანებაში წერია, რომ მიზეზი "საჯარო სივრცეში გავრცელებული განცხადებებით მაუწყებლის სარედაქციო დამოუკიდებლობისა და მიუკერძოებლობის ეჭვქვეშ დაყენება და ამის შედეგად, დამსაქმებლისთვის რეპუტაციული ზიანის მიყენებაა". ამავე საბაბით, საზოგადოებრივი მაუწყებლის გენერალურმა დირექტორმა სამსახურიდან შესაძლო გათავისუფლების შესახებ ტექნიკისა და ტექნოლოგიების მემონტაჟეთა და გრაფიკოსთა ჯგუფის მემონტაჟე-ოპერატორი, გივი კიტიაც გააფრთხილა.

ასევე იხილეთ: