Netflix 300 მილიონზე მეტი აქტიური გამომწერით ერთ-ერთი ლიდერი სტრიმინგ კომპანიაა, რომელიც საკუთარი ფინანსური მაჩვენებლებითა და გეგმებით საფონდო ბირჟაზე შთამბეჭდავ მოთამაშედ არის მიჩნეული.

ბოლო სამი წლის ჭრილში კომპანიის აქციების ღირებულება 422%-ით არის გაზრდილი. თუმცა, ამ ზრდას წინ უძღოდა ერთგვარი კრიზისი, რომელიც 2022 წელს გამომწერების დაკარგვით იყო გამოწვეული. ამ პერიოდში Netflix-ის აქციების ფასი ისტორიულ მინიმუმამდე დაეცა, რაც მაშინ კონკურენტების მოძლიერებით აიხსნა.

მიუხედავად იმისა, რომ ბაზარზე კვლავ მაღალი კონკურენციაა, Netflix ისევ რჩება აშშ-ის ბაზრის ლიდერად, რაც მას ინვესტორების თვალში მიმზიდველ კომპანიად აქცევს. აღსანიშნავია, რომ კომპანიაში ბოლო სამი წლის ზრდას უმთავრესად სარეკლამო პაკეტებიდან შემოსავლების სტაბილურობას, სპორტის გაშუქებაში ინვესტიციასა და პაროლების გაზიარებასთან გაჩაღებულ ბრძოლას უკავშირებდნენ.

ამჟამად Netflix-ის (NFLX) ერთი აქცია 1,176 დოლარად არის შეფასებული, რაც წლის დასაწყისთან შედარებით 32%-იან ზრდას ნიშნავს.

გასული კვირის მონაცემების მიხედვით, თუ ამ კომპანიის 1,000 დოლარის აქციებს ერთი წლის წინ შეიძენდი, ამჟამად შენი ინვესტიცია 1,968 დოლარის ღირებულების იქნებოდა. იმავე მოცულობის ხუთწლიანი ინვესტიცია 2,585 დოლარს, ხოლო ათწლიანი ინვესტიცია 11,102 დოლარს მოგიტანდა.

Netflix-მა გასულ კვირაში უახლესი ფინანსური შედეგებიც გამოაქვეყნა, რომელშიც ნათქვამია, რომ კომპანიამ 2025 წლის 20 ივნისით დასრულებულ კვარტალში $11.08 მილიარდის შემოსავალი მიიღო. ეს მაჩვენებელი LSEG-ის მოლოდინს $10 მილიონით აღემატება. ამავე პერიოდში მოგება ერთ აქციაზე $7.19 იყო, რაც, ასევე, ანალიტიკოსების პროგნოზზე ($7.08) მაღალი აღმოჩნდა.

არსებული მონაცემებით, Netflix-ის აქციები ინვესტორების მხრიდან საკმაოდ ძვირად ფასობს. ამჟამად, მისი ფასიანი ქაღალდები ერთ აქციაზე მისაღებ სააშუალო შემოსავალზე 59-ჯერ მეტად არის შეფასებული. ეს მონაცემი 2021 წლის შემდეგ ამ კომპანიისთვის ყველაზე მაღალია. აღნიშნული კოეფიციენტი Nvidia-თვის 55-ია, ხოლო Nasdaq 100-ის საშუალო მაჩვენებელი 40-ს უტოლდება.

ეს ნიშნავს იმას, რომ ინვესტორები ამ კომპანიისგან სამომავლოდ მაღალი მოგების მიღებას მოელიან. ამასთან, მათი მოლოდინები აქციების ფასის კიდევ უფრო გაზრდას უკავშირდება. აქვე კომპანია ამბობს, რომ მისი სტრატეგიაა, 2030 წლისთვის შემოსავლები გააორმაგოს და საბაზრო კაპიტალიზაცია 1 ტრილიონ დოლარამდე გაზარდოს.

გახსენი საინვესტიციო ანგარიში თიბისის მობაილბანკში და შეიძინე ამერიკული აქციები და ფონდები საკომისიოს გარეშე. გაითვალისწინე, რომ ეს არ არის ფინანსური რჩევა.