2025 წლის 24 ივნისს მოსამართლე ვიქტორ მეტრეველმა გოჩა სამხარაძე, რომელიც ბათუმში სასტუმრო "შერატონის" ლობიში საერთაშორისო გამჭვირვალობა — საქართველოს რეგიონული ოფისების მენეჯერს, ზვიად ქორიძეს თავს დაესხა, დამნაშავედ სისხლის სამართლის კოდექსის 126-ე მუხლის შესაბამისად ცნო და მას მხოლოდ 3000 ლარის ოდენობის ჯარიმა დააკისრა. ამის შესახებ ინფორმაციას საერთაშორისო გამჭვირვალობა — საქართველო ავრცელებს.

გავრცელებულ ინფორმაციაში წერია, რომ ჯგუფური ძალადობის მიუხედავად, ბრალი მხოლოდ ერთ პირს წარედგინა, დანარჩენი თავდამსხმელები კი დაუსჯელები დარჩნენ.
საერთაშორისო გამჭვირვალობა — საქართველოს თქმით, პროკურატურამ დანაშაულის სრული სურათი და სხვა მონაწილე პირების როლები ამ დანაშაულში განზრახ დამალა.

TI ასევე წერს, რომ თავდამსხმელებს დიმიტრი სამხარაძე — ივანიშვილის გარემოცვის ერთ-ერთი ყველაზე ოდიოზური ფიგურა და ქართული ოცნების რეგიონული მდივანი ხელმძღვანელობდა.

"თავდასხმაში ასევე მონაწილეობდნენ:

გიორგი მანველიძე — აჭარის უმაღლესი საბჭოს ფრაქცია ქართული ოცნება — დემოკრატიული საქართველოს ყოფილი თავმჯდომარე და იმჟამად აჭარის ფინანსთა და ეკონომიკის მინისტრის მოადგილე;

გოჩა სამხარაძე — სავარაუდოდ, დიმიტრი სამხარაძის ნათესავი და თანმხლები პირის მძღოლი;

და რამდენიმე სხვა პირი," — წერია განცხადებაში.

ცნობისთვის, 15 იანვარს ბათუმში, სასტუმრო შერატონში ჟურნალისტ ზვიად ქორიძეს და პარტია საქართველოსთვის ლიდერს, გიორგი გახარიას ქართული ოცნების დეპუტატი დიმიტრი სამხარაძე და აჭარის უმაღლესი საბჭოს წევრი გიორგი მანველიძე, სხვა პირებთან ერთად, თავს დაესხნენ და ფიზიკურად გაუსწორდნენ.