დეკანისა და სტუდენტების საქმე ბათუმის საქალაქო სასამართლოში — სტუდენტ ანრი კაკაბაძეს 9-თვიანი პატიმრობა მიესაჯა, თუმცა ის ციხეში მხოლოდ 2 თვეს გაატარებს, რადგან უკვე 7 თვეა წინასწარ პატიმრობაშია. რაც შეეხება დანარჩენ ბრალდებულებს, მათ გირაო შეეფარდათ.

ბათუმის ხელოვნების უნივერსიტეტის დეკანს, მამუკა ჯორბენაძეს 20 000-ლარიანი ჯარიმა შეეფარდა, მაგრამ 18 000 ლარს გადაიხდის, რადგან დანარჩენი 2-თვიანი წინასწარი პატიმრობიდან დაექვითება. გურამ მიქელაძეს, დავით გვიანიძესა და გიორგი დავითაძეს კი 17-17 ათას ლარიანი ჯარიმა დაეკისრათ და 15-15 ათას ლარს გადაიხდიან.

შეგახსენებთ, პოლიციამ ბათუმის ხელოვნების სახელმწიფო უნივერსიტეტის დეკანი და ოთხი სტუდენტი 2024 წლის 9 დეკემბერს სისხლის სამართლის წესით, ჯგუფურად ჩადენილი ძალადობის ბრალდებით დააკავა.

ცნობისთვის, შინაგან საქმეთა სამინისტრომ ამ საქმეზე განცხადება გაავრცელა და თქვა, რომ 3 დეკემბერს ბათუმში გამართული საპროტესტო აქციის ფარგლებში, აქციის მონაწილეთა ჯგუფი ბათუმის ხელოვნების სასწავლო უნივერსიტეტში შევიდა რექტორის სამუშაო ოთახთან ბანერის გაკვრის მიზნით, რის საშუალებაც მათ არ მისცა ამავე უნივერსიტეტის ლექტორმა თ.ც.-მ. ამის გამო უნივერსიტეტის დეკანმა მ.ჯ.-მ მას სიტყვიერი შეურაცხყოფა მიაყენა.

მიმდინარე წლის 28 იანვარს წინასასამართლო სხდომაზე, დეკანსა და სტუდენტებს აღკვეთი ღონისძიების სახით პატიმრობა გირაოთი შეეცვალათ. ანრი კაკაბაძე კი ამავე კატეგორიის დანაშაულისთვის გირაოთი აქამდე იყო გათავისუფლებული. სწორედ ამ არგუმენტით დატოვა მოსამართლე ლევან ყოლბაიამ ანრი კაკაბაძე პატიმრობაში.

ასევე იხილეთ: