საქართველოში "მტკიცე სული 2025-ის" მრავალეროვნული საერთაშორისო წვრთნები იწყება. წვრთნები 25 ივლისიდან 6 აგვისტოს ჩათვლით გაიმართება.

"მტკიცე სული 2025" ხაზს უსვამს შავი ზღვის რეგიონში უსაფრთხოებისა და სტაბილურობისადმი აშშ-ს ერთგულებას და ყურადღებას ამახვილებს უსაფრთხოების მხრივ საერთო გამოწვევების წინაშე მტკიცე ალიანსებისა და პარტნიორობის მნიშვნელობაზე", — წერს ევროპასა და აფრიკაში აშშ-ს არმია პრესრელიზში.

Agile Spirit 2025 არის რიგით მეთორმეტე მრავალეროვნული სამხედრო წვრთნა, რომელსაც საქართველო და თურქეთი ერთობლივად მასპინძლობენ. მისი მიზანია ნატოსა და პარტნიორ ქვეყნებს შორის ურთიერთქმედების, საბრძოლო მზადყოფნისა და ერთობლივი ოპერაციების უნარების გაძლიერება. წვრთნებს ერთობლივად ხელმძღვანელობენ საქართველოს დასავლეთის სარდლობა.

წვრთნები 21 ივლისს თურქეთის ქალაქ ადანასთან ამერიკულ-თურქული საჰაერო სადესანტო ოპერაციით იწყება, რის შემდეგაც საქართველოში გადმოინაცვლებს — კონკრეტულად კი წვრთნები ჩატარდება კრწანისის, ვაზიანის, ნორიოს, მუხროვანისა და სენაკის სამხედრო პოლიგონებზე.

Agile Spirit 2025-ში საქართველო, აშშ, თურქეთი, პოლონეთი, გერმანია, იტალია, საბერძნეთი, მოლდოვა, რუმინეთი, ბულგარეთი, სლოვაკეთი, ლიტვა და უკრაინა მონაწილეობენ, ხოლო სომხეთი და იაპონია წვრთნებს დამკვირვებლის სტატუსით ესწრებიან.