პარლამენტის პირველი ვიცე-სპიკერის, გია ვოლსკისთვის გაუგებარია, რატომ არის ოპოზიციისთვის მიუღებელი საარჩევო სისტემაზე ხელისუფლების შეთავაზება. მისი თქმით, ოპოზიციის მიზანი დესტრუქციული პოზიციის გამოხატვაა.

"100/50-ზე რატომ უნდა იყოს მიუღებელი გაუგებარია. პროპორციული წარმომადგენლობა უნდათ, რაშიც დარწმუნებულები არიან, რომ მოიგებენ რატომაც არა, რატომ ამბობენ უარს თუკი მიაჩნიათ, რომ უფრო პოპულარულები არიან საზოგადოებაში რატომ ამბობენ უარს, რომ საზოგადოებამ აირჩიოს თავისი წარმომადგენლები, პიროვნებები პარლამნეტში," — თქვა გია ვოლსკიმ იმედთან საუბრისას.

ოპოზიციის ლიდერებსა და ხელისუფლებას შორის საარჩევნო სისტემასთან დაკავშირებით დიალოგი გიგი უგულავას დაკავების შემდეგ შეწყდა. გუშინ, 25 თებერვალს ღამით აშშ-ს ელჩის მოადგილის რეზიდენციაში ოპოზიციის ლიდერების, დიპლომატებისა და ხელისუფლების წარმომადგენლების შეხვედრა გაიმართა. ღონისძიების გამართვის შესახებ მედიისთვის ცნობილი არ იყო. შენობის დატოვების შემდეგ ოპოზიციონერებმა თქვეს, რომ შეხვედრის ორგანიზატორი აშშ-ს ელჩის მოადგილე იყო. ოპოზიციის ლიდერების თქმით, შეხვედრაზე არანაირ კონკრეტულ საკითხზე შეთანხმება არ მომხდარა.

ოპოზიციის ლიდერის დაკავება და შეწყვეტილი დიალოგი

ოპოზიციასა და ხელისუფლებას შორის დიპლომატების ორგანიზებული მოლაპარაკებები ოპოზიციონერ გიგი უგულავას დაკავების შემეგ ჩაიშალა. თბილისის ყოფილ მერსა და ოპოზიციის ერთ-ერთ ლიდერს პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდეგომ მოლაპარაკებას აზრი არ აქვს.

სამთავრობო გუნდის ლიდერებმა მომხდარის შეფასება არ ისურვეს და აშშ-ის ელჩთან შეხვედრის დატოვების შემდეგ კი განაცხადეს, რომ მოგვიანებით ისაუბრებენ. დეპუტატებმა კი მომხდარი "ადეკვატურ განაჩენად შეაფასეს".