ევროპული საქართველოს დეპუტატის, დავით ბაქრაძის თქმით, გიგი უგულავას დაკავების შემდეგ ოპოზიცია მშვიდობიან, არაძალადობრივ ბრძოლას გააგრძელებს. მან TV პირველთან საუბრისას თქვა, რომ უზენაესი სასამართლოს ამ გადაწყვეტილებით ქვეყანაში ინსტიტუტებისა და სამართლის ნგრევის "კიდევ ერთი სამარცხვინო "რეკორდი" დამყარდა.

"კიდევ ერთი ანტირეკორდი დამყარდა საქართველოში. ის რო უგულავას დაჭერას უპირებდნენ და ეს პოლიტიკური გადაწყვეტილება იყო, ამას ყველა ვხედავდით, მაგრამ ნახეთ რაზე დაიჭირეს და როგორ. პოლიტიკურ ლიდერს იჭერ ისე, რომ მას არ აძლევ სასამართლოში მისვლის საშუალებას.... ეს ყველაფერი არის ზღვარსმიღმა გასული ანგარიშსწორება", — თქვა დავით ბაქრაძემ.

მან On.ge-სთან საუბრისას აღნიშნა, რომ ხელისუფლებამ პოლიტიკური დიალოგის სივრცე "მოკლა". მომავალ გეგმებთან დაკავშირებით ოპოზიცია უახლოეს დღეებში მოლაპარაკებას გამართავს და საზოგადოებასაც გააცნობს, როგორ გაგრძელდება ბრძოლა.

თბილისის ყოფილ მერსა და ოპოზიციის ერთ-ერთ ლიდერს, გიგი უგულავას პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა. საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ შალვა თადუმაძემ განიხილა. მასთან ერთად შემადგენლობაში იყვნენ მოსამართლეები, მერაბ გაბინაშვილი და გიორგი შავლიაშვილი.

საქმე ეხება თბილისის განვითარების ფონდის საქმეს, რაზეც გიგი უგულავა და მასთან ერთად ბრალდებული 4 პირი 2018 წლის თებერვალში დამნაშავედ სცეს. გიგი უგულავას პროკურატურა მერობის პერიოდში თბილისის განვითარების ფონდიდან 48 მილიონი ლარის მითვისება-გაფლანგვას ედავება.

2018 წლის თებერვალში თბილისის საქალაქო სასამართლომ თბილისის ყოფილი მერი გიგი უგულავა და მასთან ერთად ბრალდებული ოთხი პირი, ე.წ. ფონდების საქმეში დამნაშავედ ცნო. უგულავას მიუსაჯეს 1 წლითა და 3 თვით თავისუფლების აღკვეთა, თუმცა სხვა საქმეზე გამოტანილმა განაჩენმა ახალი განაჩენი შთანთქა. მას სასჯელი მოხდილად ჩაეთვალა.

ბრალდების მხარე ამტკიცებდა, რომ თბილისის მერმა და ერთიანი ნაციონალური მოძრაობის თბილისის საქალაქო ორგანიზაციის თავმჯდომარემ, გიგი უგულავამ მერიის სხვა მაღალჩინოსნებთან ერთად, შეიმუშავა დანაშაულებრივი სქემა: "თბილისის განვითარების ფონდის კუთვნილი თანხით 2012 წლის ოქტომბრის საპარლამენტო არჩევნებთან დაკავშირებული ერთიანი ნაციონალური მოძრაობის წინასაარჩევნო ხარჯების დასაფინანსებლად".