ნაციონალური მოძრაობის დეპუტატის, თინა ბოკუჩავას თქმით, გიგი უგულავას დაპატიმრების გადაწყვეტილებით ხელისუფლებამ მოლაპარაკებები ჩაშალა. მან ოპოზიციის აქცია, პიკეტი და მაჟორიტარულ ოლქებზე შეთანმხება დააანონსა.

"ხელისუფლებამ ჩაშალა მოლაპარაკება, როდესაც მესამედ შეაბრუნა გიგი უგულავა იგივე საქმეზე და სხვა გამოსავალი ნამდვილად არ დატოვა. არცერთი თავმოყვარე პოლიტიკური პარტია თუ პოლიტიკური ლიდერი არ დაჯდება ამ დანაშაულებრივ რეჟიმთან მოლაპარაკებაზე იმ პირობებში, როდესაც ასე უსამართლოდ ექცევიან ერთ-ერთ მთავარ პოლიტიკურ ოპონენტს", — თქვა თინა ბოკუჩავამ.

ბოკუჩავამ აღნიშნა, რომ ბიძინა ივანიშვილმა ამ გადაწყვეტილებით ყველა საერთაშორისო პარტნიორის მოსაზრება უგულებელყო, მათ შორის პოლიტიკურ დევნასთან დაკავშირებით.

თბილისის ყოფილ მერსა და ოპოზიციის ერთ-ერთ ლიდერს, გიგი უგულავას პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა. საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ შალვა თადუმაძემ განიხილა. მასთან ერთად შემადგენლობაში იყვნენ მოსამართლეები, მერაბ გაბინაშვილი და გიორგი შავლიაშვილი.

საქმე ეხება თბილისის განვითარების ფონდის საქმეს, რაზეც გიგი უგულავა და მასთან ერთად ბრალდებული 4 პირი 2018 წლის თებერვალში დამნაშავედ სცეს. გიგი უგულავას პროკურატურა მერობის პერიოდში თბილისის განვითარების ფონდიდან 48 მილიონი ლარის მითვისება-გაფლანგვას ედავება.

2018 წლის თებერვალში თბილისის საქალაქო სასამართლომ თბილისის ყოფილი მერი გიგი უგულავა და მასთან ერთად ბრალდებული ოთხი პირი, ე.წ. ფონდების საქმეში დამნაშავედ ცნო. უგულავას მიუსაჯეს 1 წლითა და 3 თვით თავისუფლების აღკვეთა, თუმცა სხვა საქმეზე გამოტანილმა განაჩენმა ახალი განაჩენი შთანთქა. მას სასჯელი მოხდილად ჩაეთვალა.

ბრალდების მხარე ამტკიცებდა, რომ თბილისის მერმა და ერთიანი ნაციონალური მოძრაობის თბილისის საქალაქო ორგანიზაციის თავმჯდომარემ, გიგი უგულავამ მერიის სხვა მაღალჩინოსნებთან ერთად, შეიმუშავა დანაშაულებრივი სქემა: "თბილისის განვითარების ფონდის კუთვნილი თანხით 2012 წლის ოქტომბრის საპარლამენტო არჩევნებთან დაკავშირებული ერთიანი ნაციონალური მოძრაობის წინასაარჩევნო ხარჯების დასაფინანსებლად".