ევროპარლამენტის საგარეო საქმეთა კომიტეტის წევრები, რომლებიც, ასევე საქართველოს საკითხებზე მუშაობენ, გიგი უგულავას დაკავებასთან დაკავშირებით განცხადებას ავრცელებენ და ამბობენ, რომ უზენაესის სასამრთლოს გადაწყვეტილების მიმართ კითხვები არსებობს. განცხადება ევროპარლამენტის ოფიციალურ გვერდზე გამოქვეყნდა.

როგორც განცხადებაში ვკითხულობთ, დამოუკიდებელი და მიუკერძოებელი სასამართლოს სისტემა, არა მხოლოდ დემოკრატიისთვისაა აუცილებელი, არამედ ევროკავშირთან ასოცირების ხელშეკრულებით საქართველოს მიერ ნაკისრი ვალდებულებაცაა.

"სამწუხაროდ, გიგი უგულავას საქმეზე უზენაესი სასამართლოს გადაწყვეტილება ბადებს კითხვებს: პროცედურასთან, დროსთან და გადაწყვეტილების მოტივაციასთან დაკავშირებით. ის კიდევ უფრო აძლიერებს საქართველოში ისედაც არსებულ პოლიტიკურ დაძაბულობას. უმრავლესობასა და ოპოზიციას შორის დიალოგის გაგრძელება სასიცოცხლოდ მნიშვნელოვანია საარჩევნო სისტემის რეფორმასთან დაკავშირებით კონსესუსის მისაღწევად, რომელიც ყველაზე უკეთ გამოხატავს ქართველი ხალხის ნებას", — ნათქვამია განცხადებაში.

განცხადებას ხელს აწერენ საგარეო ურთიერთობათა კომიტეტის თავმჯდომარე, სახალხო პარტიის წევრი დევიდ მაკალისტერი და ქართული ოცნების პარტნიორი სოციალ-დემოკრატიული ალიანსის წევრები: ასოცირების საპარლამენტო საბჭოს თანათავმჯდომარე მარინა კალიურანდი და საგარეო საქმეთა კომიტეტის მუდმივი მომხსენებელი სვენ მიკსერი.

პარალელურად კი მმართველი გუნდის წევრები სტრასბურგში, ევროპარლამენტარებთან შეხვედრებს მართავენ. შეხვედრების შემდეგ კი გადაწყდა, რომ უგულავას საქმესთან დაკავშირებით ევროპარლამენტარების მონაწილეობით მრავალპარტიული ფაქტების დამდგენი მისია შეიქმნება.

უგულავას დაკავება და შეწყვეტილი დიალოგი

თბილისის ყოფილ მერსა და ოპოზიციის ერთ-ერთ ლიდერს, გიგი უგულავას პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა. საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ შალვა თადუმაძემ განიხილა.

როგორც მისმა ადვოკატმა, ბექა ბასილაიამ თქვა, უგულავა უზენაესმა სასამართლომ იმ მუხლით გაასამართლა, რომლითაც 9-წლიანი პატიმრობა იყო გათვალისწინებული. თუმცა, ამ მუხლზე ამნისტია გავრცელდა, განახევრდა. იმის გამო, რომ მას მოხდილი ჰქონდა წელიწადი და ოთხი თვე, პატიმრობაში ყოფნა სამ წელზე მეტ ხანს მოუწევს.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდეგომ მოლაპარაკებას აზრი არ აქვს.

სამთავრობო გუნდის ლიდერებმა მომხდარის შეფასება არ ისურვეს და აშშ-ის ელჩთან შეხვედრის დატოვების შემდეგ კი განაცხადეს, რომ მოგვიანებით ისაუბრებენ. დეპუტატებმა კი მომხდარი "ადეკვატურ განაჩენად შეაფასეს".