ალბათ მაღაზიაში ჩასვლისას საფულე სახლში ერთხელ მაინც დაგრჩენია, უფრო მეტიც, შესაძლოა მაღაზიაში სრულიად ხელცარიელიც ჩასულხარ და ამის გამო სახლში ამობრუნება დაგჭირვებია. თუმცა, მალე, ეს ისტორიები, შესაძლოა, წარსულს ჩაბარდეს.

ის, რაც ბავშვობიდანვე ხშირად გვესმის ის არის, რომ ერთი რამ, რაც სახლში ვერასდროს დაგრჩება, შენი თავია. სწორედ აქ გამოგადგებათ გადახდის ახალი ინოვაციური მეთოდი, რომლისთვისაც მხოლოდ ერთი რამეა საჭირო: თქვენი სახე.

მსოფლიოს მასშტაბით Face ID-ის გადახდის სერვისი ნელ-ნელა ინერგება. ჩინეთში მას წლები, ხოლო უკრაინაში — თვეებია, რაც იყენებენ. ამ სერვისის გამოყენებისას სახის სკანირება ხდება, რომლის პროპორციებიც პირად ანგარიშზეა შენახული.

სკეპტიკურად ხარ განწყობილი? მაშინ შენჯენის მაგალითზე მოგიყვებით. ჩინეთის ტექნოლოგიურ "დედაქალაქში" მოქალაქეები მეტროში სახის ამომცნობი პროგრამით მგზავრობენ.

Face ID-ით მგზავრობა სრულიად უსაფრთხოა, რადგან ის უსაფრთხოების ბიომეტრიულ სისტემას იყენებს. სისტემა იდენტიფიკაციას ახდენს რამდენიმე სენსორის მეშვეობით, როგორიცაა: ულტრაიისფერი სენსორი, წერტილოვანი პროექტორი და განათების ილუმინატორი. ეს ყველაფერი კი მას კიდევ უფრო სანდოს ხდის. ალბათობა იმისა, რომ სხვა შემთხვევითმა ადამიანმა შეძლოს თქვენი Face ID-ით მგზავრობა, შეუძლებელია.

ასევე ჩინეთში მდებარე KFC-ში 2017 წლიდან სწრაფი კვების ობიექტის მომხმარებლები ფრთებს "ღიმილით" ყიდულობენ. წარმოიდგინე, მიდიხარ მონიტორთან, არჩევ სასურველ მენიუს და ერთი შეხედვით ის უკვე შენია.

ფოტო: Alibaba Group

Face ID-ით გადახდის მთავარი უპირატესობა სისწრაფე, სიმარტივე და დამოუკიდებლობაა: რიგში დგომა ნაკლებად გიწევს, მაღაზიის თანამშრომლის ნელი მოქმედებებით არ ღიზიანდები და შეცდომის შემთხვევაში, არც უხილავად დიდი ძალაუფლების მქონე ადმინისტრატორის ლოდინი გიწევს. მისი სარგებელი ისიცაა, რომ შენი ბალანსით ვერავინ ისარგებლებს, რადგან გადახდისთვის შენი სახეა საჭირო.

უკრაინაში სერვისი მაისის ბოლოდან გამოჩნდა. სავაჭრო ცენტრ Kasta-ში მომხმარებლები თითქმის 6 თვეა მარტივად და კონსულტანტისგან დამოუკიდებლად ყიდულობენ სამოსს. მოხერხებული პროცესი ბრენდის რეკლამაშიც ჩანს.

როგორც ხედავთ, სამეცნიერო ფანტასტიკის წიგნებში ამოკითხული ამბები ჩვენს გარშემო ნელ-ნელა ცოცხლდება. ზღაპრების კითხვის დროს ოდესმე იფიქრებდით, რომ სასურველი ნივთის შესაძენად ერთი გაღიმებაც საკმარისი იქნებოდა?