59 წლის ასაკში გარდაიცვალა ქართველი როკმუსიკოსი, დადა დადიანი. ბოლო ცნობების მიხედვით, მისი ჯანმრთელობის მდგომარეობა არასახარბიელო იყო, თუმცა მისი გარდაცვალების ზუსტი მიზეზი ჯერჯერობით უცნობია.

დადა დადიანი მეოცე საუკუნის ქართული ალტერნატიული მუსიკის ერთ-ერთი პიონერი იყო. 80-იან წლებში მან დააარსა ჯგუფი "ტაქსი", 1992 წელს კი — "საბავშვო მედიცინა".

1993 წლის მიწურულს დადა დადიანმა საქართველო დატოვა და ინგლისში ცხოვრობდა, თუმცა რამდენიმე წლის წინ ის სამშობლოში დაბრუნდა. 2024 წელს ქართული ალტერნატიული მუსიკის "ნათლიად" წოდებული დადა დადიანის ჯანმრთელობის მდგომარეობით შეშფოთებულმა მსმენელმა მუსიკოსისთვის თანხის ასაგროვებელი საღამოც მოაწყო.

დადა დადიანი მუსიკას ქმნიდა ისეთ მუსიკოსებთან, როგორებიც იყვნენ ირაკლი ჩარკვიანი, ქიშო გლუნჩაძე, სერგი გვარჯალაძე, ბიბი კვაჭაძე. მის მრავალფეროვან მუსიკაში ერთიანდებოდა ნიუ ვეივის, ფოლკლორის, ჰიპ-ჰოპისა და სხვა ჟანრების ელემენტები.