ჰარი პოტერის სერიალის გადაღებები სულ მალე დაიწყება. სერიალის შესახებ ყოველი მორიგი სიახლის შემდეგ ფანების მოლოდინი ათმაგდება. პოტერიადის შემქმნელის, ჯოან როულინგის, ახალმა განცხადებამ კი ინტერესი კიდევ უფრო გაამძაფრა.

"ჰარი პოტერის სერიალის პირველი ორი ეპიზოდის სცენარი წავიკითხე და ძალიან, ძალიან, ძალიან კარგია", — წერს როულინგი X-ზე (ყოფილ ტვიტერზე).

პოსტის პასუხად, როულინგს ჩაეკითხნენ, თავად თუ არის ჩართული სცენარზე მუშაობის პროცესში, რაზეც მწერალმა უარით უპასუხა.

"არა, მაგრამ ძალიან ნიჭიერ სცენარისტებთან აქტიურად ვთანამშრომლობ", — ამატებს იგი.

აღსანიშნავია, რომ ჯადოსნური ცხოველების ფილმების სერიაში როულინგმა სცენარისტის როლიც მოირგო. რაც შეეხება ჰარი პოტერის მომავალ სერიალს, HBO-მ თავიდანვე განაცხადა, რომ მწერალი აქტიურად იქნებოდა ჩართული შემოქმედებით პროცესში და აღმასრულებელი პროდიუსერის სკამს დაიკავებდა.

პოტერიადის სერიალის გადაღებები სტარტს ამ ზაფხულს აიღებს. უკვე ვიცით ყველა ძირითადი პერსონაჟის შემსრულებელი მსახიობის ვინაობაც. ლეგენდარულ ტრიოს — ჰარის, რონს და ჰერმიონს — სერიალში დომინიკ მაკლაფლინი, ალასტერ სტაუტი და არაბელა სტენტონი განასახიერებენ.

რაც შეეხება შემოქმედებით გუნდს, სერიალზე Game of Thrones-ისა და The Last of Us-ის რეჟისორი, მარკ მაილოდი, იმუშავებს. პროექტის შემოქმედებითი ხელმძღვანელი, სცენარისტი და ერთ-ერთი აღმასრულებელი პროდიუსერი კი ფრანჩესკა გარდინერი იქნება. გარდინერს აქამდე ისეთ გახმაურებულ სერიალებზე უმუშავია, როგორებიცაა Succession და Killing Eve.

აღსანიშნავია, რომ სამსახიობო შემადგენლობის გამოქვეყნებას ფანებში არაერთგვაროვანი გამოხმაურება მოჰყვა; განსაკუთრებული კრიტიკა დაიმსახურა პროფესორ სევერუს სნეიპის როლზე შავკანიანი მსახიობის, პააპა ესიდუს, დამტკიცებამ.

ჯოან როულინგის ჰარი პოტერი ყველა დროის ერთ-ერთი ყველაზე პოპულარული წიგნების სერიაა. ის თარგმნილია 87 ენაზე და მსოფლიოში 600 მილიონზე მეტ ეგზემპლარად არის გაყიდული. შვიდწიგნეულის მიხედვით გადაღებული რვავე ფილმის შემოსავალმა კი ჯამში $7,7 მილიარდს გადააჭარბა.

რაც შეეხება HBO-ის სერიალს, მის პირველ სეზონს, სავარაუდოდ, 2026 წლის ბოლოსთვის ვიხილავთ.

ასევე იხილეთ:

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…