ბარბრა სტრაისენდი ყველა დროის ერთ-ერთი ყველაზე აღიარებული ამერიკელი მომღერალია, რომლის კარიერაც ნახევარ საუკუნეზე მეტს ითვლის. ამ ხნის განმავლობაში, სტრაისენდმა 36 სტუდიური ალბომი გამოუშვა, გაყიდა 150 მილიონზე მეტი ჩანაწერი და გახდა პირველი მუსიკოსი, რომელმაც EGOT-ის სტატუსი მიიღო (ოთხ სფეროში — ტელეინდუსტრიაში, მუსიკაში, კინოსა და თეატრში — ყველაზე პრესტიჟული ამერიკული ჯილდოების, ემის, გრემის, ოსკარისა და ტონის, აღმნიშვნელი აკრონიმი). თუმცა, ასეთი შთამბეჭდავი მიღწევებისა და ხანგრძლივი კარიერის მიუხედავად, თავად მუსიკოსი საკუთარ თავს "ზარმაცს" უწოდებს.

"ძალიან ზარმაცი ვარ, არ მომწონს, რომ მუშაობა მიწევს", — აღნიშნავს სტრაისენდი უახლეს ინტერვიუში, — "თავისუფლება მიყვარს, როცა პასუხისმგებლობები არ მაქვს".

მომღერალი თავისი კარიერის მასშტაბსაც პროდიუსერ ჯეი ლენდერსს უმადლის; ყოველთვის კარიერის დასრულებაზე მეფიქრებოდა, მაგრამ ის მარწმუნებდა ხოლმე, რომ ახალი ალბომი გამომეშვაო.

ფოტო: Valerie Macon / AFP

თავის ცხოვრებასა და კარიერაზე სტრაისენდმა 2023 წელს გამოქვეყნებული სქელტანიანი, 970-გვერდიანი ავტობიოგრაფიით My Name Is Barbra ("მე მქვია ბარბრა") მოჰყვა. სხვათა შორის, წიგნის 48-საათიანი აუდიოვერსიაც თავად მუსიკოსმა ჩაწერა.

სტრაისენდის "სიზარმაცეს" კითხვის ნიშნის ქვეშ აყენებს მორიგი სიახლეც — 83 წლის მუსიკოსი ახალ, რიგით 37-ე სტუდიურ ალბომს უშვებს, რომელიც სხვა ლეგენდარულ მომღერლებთან და თანამედროვე შემსრულებლებთან დუეტებს გააერთიანებს. ალბომში, სახელწოდებით The Secret of Life: Partners, Volume Two, შედის პოლ მაკ-კარტნისთან, ბობ დილანთან, სემ სმითთან, არიანა გრანდესთან, მერაია ქერისთან და სტინგთან ჩაწერილი დუეტები.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...