თავდაცვის ყოფილი მინისტრ ირაკლი ოქრუაშვილს ციხეში ახალი ბრალი წაუყენეს. მისი ადვოკატის, მამუკა ჭაბაშვილის განცხადებით, ოქრუაშვილთან რუსთავის მე-12 პენიტენციურ დაწესებულებაში გამომძიებელი რამდენიმე დღის წინ შევიდა.

ადვოკატის თქმით, საქმე ორი წლის წინ მომხდარ ინციდენტს ეხება.

"ირაკლი ოქრუაშვილი არ დაესწრება პროცესს იმიტომ, რომ ჩათვალა რომ აზრი არ აქვს მის მოსვლას. მინდა აღვნიშნო, რომ სულ რამდენიმე დღის წინ, გამომძიებელი შესულა ირაკლი ოქრუაშვილთან და ორი წლის წინანდელ, რაღაც ბანალურ, ყოფით თემაზე ბრალი წაუყენებიათ.

ახლა დეტალები არ ვიცი, ჩავერთვები საქმეში და გავარკვევ, უბრალოდ ესეც ნიშანდობლივია, ორი წლის წინანდელ ყოფით თემაზე, სამეზობლოში რაღაც შელაპარაკებაზე დღეს უყენებენ ბრალს. დეტალები არ ვიცი, სასამართლო ვიცი უკვე წინასწარ, რა განაჩენსაც მიიღებს," — განაცხადა ადვოკატმა.

რაც შეეხება წულუკიანის კომისიაზე ოქრუაშვილის გამოუცხადებლობის საქმეს, მამუკა ჭაბაშვილი ფიქრობს, რომ სასამართლო თავდაცვის ყოფილ მინისტრს ამ საქმეზე პატიმრობას შეუფარდებს.

"როგორც სხვებთან, აქ გამონაკლისი არ იქნება, დარწმუნებული ვარ", — აღნიშნა მამუკა ჭაბაშვილმა.

ცნობისთვის, დღეს მოსამართლე ნინო გალუსტაშვილმა სტრატეგია აღმაშენებლის ლიდერს, გიორგი ვაშაძეს წულუკიანის კომისიაზე გამოუცხადებლობისთვის 7-თვიანი პატიმრობა შეუფარდა. განაჩენის გამოცხადებას გიორგი ვაშაძე არ დასწრებია. ის ოპოზიციის სხვა ლიდერებთან ერთად სასამართლოს გადაწყვეტილებას პარტიის ოფისში ელოდებოდა. მას აღკვეთის ღონისძიების სახით 50 000-ლარიანი გირაო ჰქონდა შეფარდებული, რაც მან კანონით დადგენილ ვადაში გადაიხადა.

შეგახსენებთ, ამავე კომისიაზე გამოუცხადებლობისთვის კოალიცია ცვლილებისთვის ლიდერს ზურაბ გირჩი ჯაფარიძეს 7 თვით, ხოლო კოალიცია ლელო — ძლიერი საქართველოს ლიდერებს მამუკა ხაზარაძესა და ბადრი ჯაფარიძეს 8-8 თვით პატიმრობა შეეფარდათ. ასევე, წულუკიანის კომისიაზე გამოუცხადებლობისთვის ციხეში არიან კოალიცია ცვლილებისთვის ლიდერები — ნიკა გვარამია და ნიკა მელია. გვარამიას საქმის არსებითი განხილვა საქალაქო სასამართლოში დღეს გრძელდება. დღესვე უნდა გამოცხადდეს ირაკლი ოქრუაშვილის განაჩენიც.

ასევე იხილეთ: