თბილისის საქალაქო სასამართლოში სტრატეგია აღმაშენებლის ლიდერის, გიორგი ვაშაძის პროცესი მიმდინარეობს. სხდომას პოლიტიკოსი არ ესწრება და გადაწყვეტილებას პარტიის ოფისში ელოდება. მას ოცნების პარლამენტის საგამოძიებო კომისიაზე გამოუცხადებლობას ედავებიან.

ცნობისთვის გიორგი ვაშაძეს აღკვეთის ღონისძიების სახით 50 000-ლარიანი გირაო ჰქონდა შეფარდებული, რაც მან კანონით დადგენილ ვადაში გადაიხადა.

"ყველაფერი დამოკიდებულია პოლიტიკურ გადაწყვეტილებაზე, დროის საკითხია დღეს იქნება ხვალ თუ ზეგ გადაწყვეტილება ამ საკითხთან დაკავშირებით. ჩვენს ხელში არ არის ეს დრო, ეს დრო არის რეჟიმის ხელში, მაგრამ ჩვენს ხელში რაც არის, ეს არის ერთიანობა, ბრძოლა, წინააღმდეგობა, ურყეობა იმისთვის, რომ საბოლოო გამარჯვებას მივაღწიოთ. 100%-ით დარწმუნებული ვარ, რომ ჩვენ გამარჯვებას მივაღწევთ, მთავარია ვიყოთ ერთიანები დანარჩენი რაც არ უნდა მოიმოქმედონ, ჩემი პატიმრობა და ერთეულების დაპატიმრება არაფერი არ არის. მთელი საქართველო ჰყავს ახლა დაპატიმრებული ქართულ ოცნებას და საქართველოს გათავისუფლებისთვის ვიბრძვით ახლა ჩვენ. ყველას დიდი მადლობა მხარდაჭერისთვის" — განაცხადა გიორგი ვაშაძემ.

სტრატეგია აღმაშენებლის ოფისში მისთვის სოლიდარობის გამოსაცხადებლად მივიდნენ — საქართველოს მეხუთე პრეზიდენტი სალომე ზურაბიშვილი, კოალიცია ცვლილებისტვის ლიდერი ელენე ხოშტარია, ევროპული საქართველოს ლიდერი გიგი წერეთელი, ნაციონალური მოძრაობის ლიდერები — ლევან ხაბეიშვილი, ხატია დეკანოიძე, სოფო ჯაფარიძე და გაერთიანება რუსთაველის გამზირის წევრი პაატა ბურჭულაძე.

შეგახსენებთ, წულუკიანის კომისიაზე გამოუცხადებლობისთვის კოალიცია ცვლილებისთვის ლიდერს ზურაბ გირჩი ჯაფარიძეს 7 თვით, ხოლო კოალიცია ლელო — ძლიერი საქართველოს ლიდერებს მამუკა ხაზარაძესა და ბადრი ჯაფარიძეს 8-8 თვით პატიმრობა შეეფარდათ. ასევე, ამ კომისიაზე გამოუცხადებლობისთვის ციხეში არიან კოალიცია ცვლილებისთვის ლიდერები — ნიკა გვარამია და ნიკა მელია. გვარამიას საქმის არსებითი განხილვა საქალაქო სასამართლოში დღეს გაგრძელდება. მოსალოდნელია, რომ დღესვე გამოცხადდეს ირაკლი ოქრუაშვილის განაჩენიც.

ასევე იხილეთ: