საქართველოს ახალგაზრდა იურისტთა ასოციაცია ოპოზიციონერი დეპუტუტატების, ზურაბ გირჩი ჯაფარიძის, მამუკა ხაზარაძისა და ბადრი ჯაფარიძისთვის პატიმრობის შეფარდება ეხმაურება და წერს, რომ "ადგილი აქვს ავი განზრახვით სისხლის სამართლის მექანიზმების გამოყენებას ოპოზიციონერი პოლიტიკოსების მიმართ"

ორგანიზაციის განცხადებით, მათ ამ შეფასებას ამყარებს განაჩენის გამოცხადებამდე ოცნების პრემიერის, ირაკლი კობახიძის განცხადება, რომლის მიხედვითაც, ის, ვინც არ აღიარებს [ამ პარლამენტს], "წავლენ ციხეში".

"2025 წლის 21 მაისს საიამ საზოგადოებას წარუდგინა დასაბუთებული სამართლებრივი მოსაზრება იმასთან დაკავშირებით, თუ რატომ არ უნდა შეფასებულიყო საგამოძიებო კომისიაზე გამოუცხადებლობა სისხლის სამართლის დანაშაულად, რაზე დაყრდნობითაც, ორგანიზაციას მიაჩნია, რომ მოცემულ შემთხვევებში ადგილი აქვს ავი განზრახვით (ulterior purpose) სისხლის სამართლის მექანიზმების გამოყენებას ოპოზიციონერი პოლიტიკოსების მიმართ.

აღნიშნულს, ასევე, ამყარებს განაჩენის გამოცხადებამდე ირაკლი კობახიძის მიერ გაკეთებული განცხადებაც, რომლის მიხედვითაც, ის, ვინც არ აღიარებს [ამ პარლამენტს], "წავლენ ციხეში".

როდესაც ხელისუფლება სისხლის სამართლის მექანიზმებს ინსტრუმენტად იყენებს განსხვავებული აზრის გასაჩუმებლად, კრიტიკოსების დასაშინებლად ან პოლიტიკური კონკურენციის აღმოსაფხვრელად, ასეთი ქმედებები არღვევს, არა მარტო, ინდივიდუალურ უფლებებს, არამედ, ძირს უთხრის დემოკრატიული პროცესებისთვის საჭირო ფუნდამენტებს.

ადამიანის უფლებათა ევროპულმა სასამართლომ არაერთ საქმეში დაადგინა, რომ პოლიტიკურად მოტივირებული დევნა, როდესაც ის მიზნად ისახავს ოპოზიციის ჩახშობას ან დემოკრატიული პროცესებით მანიპულირებას, არის კონვენციის სერიოზული დარღვევა" — ნათქვამია განცხადებაში.

ცნობისთვის, დღეს მოსამართლე ნინო გალუსტაშვილმა სტრატეგია აღმაშენებლის ლიდერს, გიორგი ვაშაძეს წულუკიანის კომისიაზე გამოუცხადებლობისთვის 7-თვიანი პატიმრობა შეუფარდა. განაჩენის გამოცხადებას გიორგი ვაშაძე არ დასწრებია. ის ოპოზიციის სხვა ლიდერებთან ერთად სასამართლოს გადაწყვეტილებას პარტიის ოფისში ელოდებოდა. მას აღკვეთის ღონისძიების სახით 50 000-ლარიანი გირაო ჰქონდა შეფარდებული, რაც მან კანონით დადგენილ ვადაში გადაიხადა.

შეგახსენებთ, ამავე კომისიაზე გამოუცხადებლობისთვის კოალიცია ცვლილებისთვის ლიდერს ზურაბ გირჩი ჯაფარიძეს 7 თვით, ხოლო კოალიცია ლელო — ძლიერი საქართველოს ლიდერებს მამუკა ხაზარაძესა და ბადრი ჯაფარიძეს 8-8 თვით პატიმრობა შეეფარდათ. ასევე, წულუკიანის კომისიაზე გამოუცხადებლობისთვის ციხეში არიან კოალიცია ცვლილებისთვის ლიდერები — ნიკა გვარამია და ნიკა მელია. გვარამიას საქმის არსებითი განხილვა საქალაქო სასამართლოში დღეს გრძელდება. დღესვე უნდა გამოცხადდეს ირაკლი ოქრუაშვილის განაჩენიც.

ასევე იხილეთ:

• ირაკლი ოქრუაშვილს ახალი ბრალი 2 წლის წინანდელ, სამეზობლოში ჩხუბის საქმეზე წარუდგინეს
• გიორგი ვაშაძე: მივმართავ ბიძინა ივანიშვილს — შენ ხარ ამ ქვეყნის მტერი, მთელი ქვეყანა გინდა ციხეში გამოკეტო, მაგრამ არ გაგივა
• გიორგი ვაშაძეს 7-თვიანი პატიმრობა შეუფარდეს — მას ხელბორკილი პარტიის ოფისში დაადეს
• გიორგი ვაშაძე: "ჩვენ გამარჯვებას მივაღწევთ, მთავარია, ვიყოთ ერთიანები"
• ბადრი ჯაფარიძე და მამუკა ხაზარაძე დააკავეს
• მამუკა ხაზარაძე: ბიძინა ვისაც შეაშინებს, იმის დედა ვატირე მე!
• შალვა პაპუაშვილი: ვინც არღვევს საქართველოს კონსტიტუციას, რა თქმა უნდა, მიიღებს შესაბამის პასუხს ქართველი ხალხისგან მისი სასამართლოების მეშვეობით