500 Global-ის, საქართველოს ბანკისა და საქართველოს ინოვაციებისა და ტექნოლოგიების სააგენტოს (GITA) პარტნიორობით, რეგიონში სტარტაპების აქსელერაციის პროგრამის 500 Global in Eurasia-ს პროგრამის შემაჯამებელი ღონისძიება, Demo Day გაიმართა.

Demo Day შესაძლებლობას აძლევს სტარტაპებს, საკუთარი იდეები ფართო აუდიტორიას გააცნონ, დაამყარონ ღირებული კავშირები, რომლებიც მათ როგორც ადგილობრივ, ისე საერთაშორისო ბაზარზე მასშტაბირებაში დაეხმარება.

აქსელერაციის პროგრამის შემაჯამებელი ღონისძიებისთვის სტარტაპები 12 კვირის განმავლობაში ემზადებიან. მენტორებთან ერთად მუშაობენ ბიზნეს იდეის გამართვაზე, ინვესტორებისა და ფონდების მოზიდვის, საკუთარი ბიზნესის სწრაფად ზრდისა და განვითარების სტრატეგიაზე.

წელს 500 Global in Eurasia-ს პროგრამაში მონაწილეობა 5 ქვეყნის 8 სტარტაპმა მიიღო, Demo Day-ზე კი აუდიტორიას საკუთარი ბიზნესი 6-მა სტარტაპმა გააცნო და ინვესტიციაც მიიღო.

Demo Day-ზე მონაწილე სტარტაპებს შორის იყვნენ:

Cuid — ხელს უწყობს დანაშაულის პრევენციას და დაცვის სისტემის ხელმისაწვდომობის ზრდას ბიზნესებისთვის და კერძო მესაკუთრეებისთვის.

Evolve — ამარტივებს ბიზნესისთვის გადამზადების პროცესს. მისი დახმარებით, ბიზნესს საშუალება ეძლევა, სულ რაღაც 24 საათში ყოვლისმომცველი კურსები და ტრენინგები მოამზადოს.

Aspis — შეიქმნა DeFAI Powerhouse AI-Agent-ებით ვაჭრობისთვის. Aspis ჩატზე დაფუძნებულია ასისტენტია, რომელიც დაგეხმარებათ თქვენი ციფრული აქტივების პორტფელის მართვაში, გადაწყვეტილებების მიღებისას ემოციური ფაქტორის გამორიცხვით. თქვენ უბრალოდ უგზავნით მას დავალებას ინგლისურად, პასუხს კი იღებთ მომენტალურად.

Quissly — ჩატზე დაფუძნებული პროდუქტების საძიებო სისტემაა, რომელიც ონლაინ მოვაჭრეებს ეხმარება, შექმნან მომხმარებელზე მორგებული გამოცდილება და ხელი შეუწყონ გაყიდვების ზრდას.

Aino — Aino prompt-ზე დაფუძნებული მდებარეობის დაზვერვის პლატფორმაა, რომელიც გეომონაცემების შეგროვებისა და დამუშავების მეშვეობით, ეხმარება მონაცემთა ანალიტიკოსებს, არქიტექტორებს, ურბანულ დამგეგმარებლებსა და სხვა დარგის წარმომადგენლებს, იმუშაონ სივრცით მონაცემებზე გლობალურად, სპეციფიკური GIS უნარების გარეშე.

Faqtor — მისი პრინციპია იყიდე ახლა, გადაიხადე მერე. პლატფორმა კომპანიებს სთავაზობს სესხს იმ მომენტში, როდესაც ყველაზე მეტად სჭირდებათ. დამტკიცების პროცესის დასაჩქარებლად, Faqtor იყენებს AI-ზე დაფუძნებულ სისტემას, რომელიც სესხის დამუშავების დროს კვირებიდან რამდენიმე დღემდე ამცირებს.

ინფორმაციისთვის, 500 Global in Eurasia 12 კვირიანი, სტარტაპების გადამზადების ინტენსიური პროგრამაა, რომლის ფარგლებშიც მონაწილეები იძენენ ყველა იმ საჭირო უნარსა და ინსტრუმენტებს, რომლებიც მათ სწრაფ ზრდაში დაეხმარება. პროგრამაში მონაწილეობა უკვე მიიღო აღმოსავლეთ ევროპის, კავკასიისა და ცენტრალური აზიის 80-ზე მეტმა სტარტაპმა.

500 Global არის გლობალური ვენჩურული საინვესტიციო კომპანია, რომელიც, 2.4 მილიარდიან აქტივებს მართავს. იგი ინვესტიციას ახორციელებს სტარტაპებში, რომლებიც ქმნიან სწრაფად მზარდ ტექნოლოგიურ კომპანიებს. 500 Global მჭიდროდ თანამშრომლობს ეკოსისტემის მთავარ მონაწილეებთან და კონსულტაციას უწევს მთავრობებს, შექმნან ისეთი სამეწარმეო ეკოსისტემა, რომელშიც სტარტაპებს ექნებათ სწრაფი განვითარების შესაძლებლობა. დღემდე 500 Global-მა მხარი დაუჭირა 5000-ზე მეტ დამფუძნებელს და 2 900-ზე მეტ კომპანიას, 80+ ქვეყნიდან. მისი პორტფოლიო მოიცავს 35-ზე მეტ კომპანიას, რომელთა ღირებულება 1 მილიარდ დოლარზე მეტია და 160+ კომპანიას, რომელთა ღირებულება 100 მილიონ დოლარს აღემატება (მათ შორის არის კერძო, საჯარო და exited”კომპანიები). 500 Global-ის გუნდი 25 ქვეყნიდან, 150+ წევრს აერთიანებს, რომლებსაც წამყვან ტექნოლოგიურ კომპანიებში მუშაობის გამოცდილება აქვთ.