"მივმართავ ბიძინა ივანიშვილს — შენ ხარ ამ ქვეყნის მტერი, მთელი ქვეყანა გინდა ციხეში გამოკეტო, მაგრამ არ გაგივა... გგონია პატიმრობით შეგვაშინებ? შენი არავის არ ეშინია", — ასე მიმართა სტრატეგია აღმნაშენებლის ლიდერმა გიორგი ვაშაძემ ქართული ოცნების საპატიო თავმჯდომარეს ბიძინა ივანიშვილს, მას შემდეგ, რაც მის საქმეზე განაჩენი გამოცხადდა.

გიორგი ვაშაძის განცხადებით, სასამართლოს ეს გადაწყვეტილება მას და მის თანაგუნდელებს კიდევ უფრო აძლიერებთ. მან ოპოზიციურ სპექტრს და საზოგადოებას ერთიანობისკენ მოუწოდა და აღნიშნა, რომ გამარჯვება გარდაუვალია.

"მარცხისთვის განწირულმა რეჟიმმა გამოიტანა გადაწყვეტილება, საზოგადოებისთვის ვიტყვი — ჩემი პატიმრობა მართლა არაფერი არ არის იმასთან შეფარებით, რა უსამართლობაც დღეს ქვეყანაში ხდება. ტოტალური უსამართლობა, ახალგაზრდა ადამიანები ციხეში, ქალები ციხეში, მაგრამ მთავარი არის ის, რომ ჩვენ ბრძოლას ვაგრძელებთ. მერწმუნეთ, ეს გადაწყვეტილებაც მე პირადად, ყელა ჩემს თანაგუნდელს, ყველას ვინც აქ არის შეკრებილი, კიდევ უფრო გვაძლიერებს და კიდევ უფრო გვაჩვენებს, რომ ჩვენ სწორ გზაზე ვდგავართ, ძალიან ბევრმა პატრიოტმა გაიარა იგივე გზა, რასაც ახლა გავდივარ მე, რასაც გადიან ჩემი მეგობრები, ვინც უკვე საპატიმრო დაწესებულებაში არიან, სინდისი პატიმრები, ვინც იქ არიან და დარწმუნებული ვარ გაცილებით მალე ვიზეიმებთ გამარჯვებას, ვიდრე ბევრს წარმოუდგენია.

მივმართავ ბიძინა ივანიშვილს — შენ ხარ ამ ქვეყნის მტერი, შენ ხარ ადამიანი, რომელმაც მე და სხვა კი არა, მთელი ქვეყანა გინდა ციხეში გამოკეტო, მაგრამ არ გაგივა და იცოდე, რომ ქართველი ხალხი ამ ბრძოლაში აუცილებლად გაიმარჯვებს და შენ შენი კობახიძეებით და სხვა ადამიანებით ვერასდროს ჩვენ გატეხვას ვერ შეძლებ. გგონია პატიმრობით შეგვაშინებ? შენი არავის არ ეშინია, იმიტომ რომ შენც, მთელი შენი გარემოცვა თქვენ ხართ არარაობები, თქვენ ხართ ადამიანები, რომლებიც ამოფარებული ხართ საპოლიციო რეჟიმს. ქუჩაში გასვლისაც გეშინიათ, ადამიანების თვალებში ჩახედვის გეშინიათ. რა გააკეთეთ ამ ქვეყანაში, სად არის ჩვენი ევროპული პერსპექტივა, სად არის ჩვენი განვითარება, სად არის საქართველო, რომელიც რეფორმების მაგალითი იყო, სად არის ინვესტიციები, რომელიც ახლა ქვეყანაში უნდა შემოდიოდეს. რამდენი სამუშო ადგილი შექმენით?! ერთადერთი რაც გააკეთეთ ციხეებს ავსებთ პოლიტიკური პატიმრებით, სინდისის პატიმრებით.

მინდა მივმართო საზოგადოებას, ერთადერთი გზავნილი მაქვს დღეს — ერთიანობა, ერთიანობა და კიდევ ერთხელ ერთიანობა, მხოლოდ ერთიანობით ჩვენ შეგვიძლია დავაჩქაროთ ეს გამარჯვება, გამარჯვებით აუცილებლად გავიმარჯვებთ, მაგრამ რაც უფრო მალე გავერთიანდებით, რაც უფრო მალე დავინახავთ, რომ ერთმანეთის გარეშე ჩვენ გაგვიჭირდება და ერთმანეთი გვჭირდება იმისთვის, რომ ჩვენი სამშობლო გადავარჩინოთ, ჩვენ მალე მივაღწევთ გამარჯვებას. საქართველო არის ჩვენი სამშობლო, პატიმრობა არის დროებითი, სამშობლო, ადამიანობა, ღირსება, ოჯახი — ეს არის ის, რაც ჩვენ ყველას გვაერთიანებს. კიდევ ერთხელ, დიდი მადლობა ყველას მხარდაჭერისთვის" — განაცხადა გიორგი ვაშაძემ.

მოსამართლე ნინო გალუსტაშვილმა "სტრატეგია აღმაშენებლის" ლიდერს, გიორგი ვაშაძეს 7-თვიანი პატიმრობა შეუფარდა. განაჩენის გამოცხადებას გიორგი ვაშაძე არ დასწრებია. ის ოპოზიციის სხვა ლიდერებთან ერთად სასამართლოს გადაწყვეტილებას პარტიის ოფისში ელოდებოდა. გიორგი ვაშაძეს ოცნების პარლამენტის დროებითი საგამოძიებო კომისიის მოთხოვნის შეუსრულებლობას ედავებოდნენ. მას აღკვეთის ღონისძიების სახით 50 000-ლარიანი გირაო ჰქონდა შეფარდებული, რაც მან კანონით დადგენილ ვადაში გადაიხადა.

შეგახსენებთ, ამავე კომისიაზე გამოუცხადებლობისთვის კოალიცია ცვლილებისთვის ლიდერს ზურაბ გირჩი ჯაფარიძეს 7 თვით, ხოლო კოალიცია ლელო — ძლიერი საქართველოს ლიდერებს მამუკა ხაზარაძესა და ბადრი ჯაფარიძეს 8-8 თვით პატიმრობა შეეფარდათ. ასევე, წულუკიანის კომისიაზე გამოუცხადებლობისთვის ციხეში არიან კოალიცია ცვლილებისთვის ლიდერები — ნიკა გვარამია და ნიკა მელია. გვარამიას საქმის არსებითი განხილვა საქალაქო სასამართლოში დღეს გაგრძელდება. მოსალოდნელია, რომ დღესვე გამოცხადდეს ირაკლი ოქრუაშვილის განაჩენიც.

ასევე იხილეთ: