რუსეთში საზოგადოების პროტესტის შემდეგ პროკურატურამ სასამართლოსგან დაკავებული მსახიობის, პაველ უსტინოვის პატიმრობის გადახედვა ითხოვა. 16 სექტემბერს მას სამი წლითა და ექვსი თვით პატიმრობა მიუსაჯეს.

დაკავების შემდეგ უსტინოვი წინასწარი დაკავების იზოლატორში მოათავსეს, სადაც ამ დრომდე იმყოფება. თუ პროკურატურის მოთხოვნა დაკმაყოფილდა უსტინოვს სარჩელის განხილვამდე გაათავისუფლებენ.

პაველ უსტინოვი მოსკოვში 3 აგვისტოს, საპროტესტო აქციის დროს დააკავეს. პროკურატურა მას წინააღმდეგოს გაწევასა და პოლიციელისთვის ხელის გადაგრეხვას ედავება. თვითონ უსტინოვი ბრალს არ აღიარებს და ამბობს, რომ აქციაში მონაწილეობას არ იღებდა.

"მე გვერდით ვიდექი, ერთ ხელში ტელეფონი მეჭირა, მეორეში ყურსასმენი. წამაქციეს, სპეციალური საშუალებებით მირტყამდნენ, წინააღმდეგო არც ერთხელ არ გამიწევია", — ყვებოდა სასამართლოში მსახიობი.

სოციალურ ქსელში გავრცელებულ ვიდეოებში ჩანს, რომ უსტინოვი დაკავებისას გაქცევას ცდილობს, თუმცა პოლიციელს თავს არ ესხმის და არც საპროტესტო ლოზუნგებს იძახის.

პაველ უსტინოვის დაკავებას რუსი მსახიობები, მომღერლები და სხვა ცნობილი სახეები პროტესტით შეხვდნენ. ისინი ონლაინკამპანიაში ჩაერთნენ და მსახიობის გათავისუფლებას მოითხოვდნენ. მათ სასამართლოს შენობასთან ერთკაციანი პიკეტებიც მოაწყვეს.

რუსეთის პრეზიდენტის პრესსპიკერმა, დიმიტრი პესკოვმა განაცხადა, რომ ვლადიმერ პუტინი ინფორმირებულია საქმის შესახებ, მაგრამ სასამართლოს გადაწყვეტილებაზე გავლენის მოხდენა არ შეუძლია.