ევროკავშირის საგარეო პოლიტიკური უწყების პრესსპიკერმა ანიტა ჰიპერმა "ევროსკოპის" კითხვის საპასუხოდ განაცხადა, რომ ევროკავშირში ტროტუარზე დგომის გამო ხალხის გასამართლებას დემოკრატიასთან შეუთავსებელია.

"სამწუხაროდ, ეს არ არის იზოლირებული შემთხვევა და ნამდვილად არის ქართული ოცნების სისტემატური და მუდმივი ძალისხმევის ნაწილი გააჩუმოს განსხვავებული ხმები და დააშინოს მშვიდობიანი მომიტინგეები. ჩვენ მკაფიოდ გამოვხატეთ ჩვენი პოზიცია, რომ ეს ქმედებები ძირს უთხრის გამოხატვისა და შეკრების თავისუფლებას, კანონის უზენაესობას და აბსოლუტურად შეუთავსებელია დემოკრატიული საზოგადოებისთვის", — განაცხადა ანიტა ჰიპერმა.

ცნობისათვის, დღეს, 23 იანვარს, თბილისის საქალაქო სასამართლოში ტროტუარზე დგომისთვის 5 მოქალაქეს ადმინისტრაციული პატიმრობა შეეფარდათ.

სანდრო მეგრელიშვილს — 4-დღიანი პატიმრობა (მოსამართლე დავით მაკარაძე);
დიმიტრი ჯამბურიას — 4-დღიანი პატიმრობა (მოსამართლე დავით მაკარაძე);
ლუკა ნაგლიაშვილს — 5-დღიანი პატიმრობა (მოსამართლე დავით მაკარაძე);
მიხეილ ზაქარეიშვილს — 5-დღიანი პატიმრობა (მოსამართლე ზვიად ცეკვავა);
ნუკრი კაკულიას — 4-დღიანი პატიმრობა (მოსამართლე მანუჩარ ცაცუა).
სასამართლო ქალ აქტივისტებთან მხოლოდ სიტყვიერი გაფრთხილებით შემოიფარგლა. მოსამართლეებმა ზვიად ცეკვავამ და მანუჩარ ცაცუამ ანი ახმეტელი და ნათია ჭავჭანიძე სამართალდამრღვევად ცნეს.