1-ელი მარტიდან, "შრომითი მიგრაციის შესახებ" კანონში შეტანილი ცვლილებები ამოქმედდება. ცვლილებების მიხედვით, საქართველოში უცხო ქვეყნის მოქალაქეებს დასაქმება შეეზღუდებათ.

კანონში შეტანილი ცვლილებების მიხედვით:

  • უცხოეთის მოქალაქეს საქართველოში მუშაობის უფლებისთვის გაფორმებული უნდა ჰქონდეს შრომითი ხელშეკრულება და მოპოვებული ჰქონდეს ბინადრობის ნებართვა;
  • უცხოეთის მოქალაქეებმა დასაქმების ნებართვისთვის ოცნების ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს უნდა მიმართოს — უწყებას მოთხოვნის განსახილველად 30 დღის ვადა აქვს;
  • იზრდება საჯარიმო სანქცია იმ დამსაქმებლებთან მიმართებაში, ვინც უცხოელს სპეციალური სამუშაო უფლების მოპოვების გარეშე დაასაქმებს;
  • დაწესდება საჯარიმო სანქცია თითოეული შრომითი მიგრანტისთვის, რომელიც საქართველოში სპეციალური სამუშაო უფლების გარეშე ეწევა შრომით საქმიანობას;

"შრომითი იმიგრანტის მიერ ადგილობრივ დამსაქმებელთან შრომითი საქმიანობის უფლების გარეშე შრომითი საქმიანობის განხორციელება — გამოიწვევს შრომითი იმიგრანტის დაჯარიმებას 2 000 ლარის ოდენობით," — ვკითხულობთ კანონში.

კანონში შეტანილი ცვლილებების განმარტებით ბარათში ვკითხულობთ, რომ ოფიციალური მონაცემებით, მაგალითად, 2015 წლიდან 2023 წლამდე მხოლოდ 3 800 უცხო ქვეყნის
მოქალაქის დასაქმებაა ოფიციალურად ასახული.

საქსტატის ოფიციალური მონაცემებით 2022-2023 წლებში საქართველოში 239 334 უცხო ქვეყნის მოქალაქე შემოვიდა, რომელიც საქართველოში მინიმუმ 6 თვით დარჩა. მას შემდეგ, რაც 2023 წლიდან "შრომითი მიგრაციის შესახებ" კანონში ცვლილებები შევიდა, წელიწადნახევარში სპეციალურ ელექტრონულ სისტემაში 42 000-ზე მეტი შრომითი იმიგრანტი დარეგისტრირდა, რაც იმას ნიშნავს, რომ სისტემაში ყოველდღიურად 50-დან 100-მდე პირი რეგისტრირდებოდა.

კანონის გამკაცრებამდე, უცხო ქვეყნის მოქალაქეს მხოლოდ შრომითი მიგრაციის სპეციალურ ელექტრონულ სისტემაში რეგისტრაცია ევალებოდა და არ არსებობდა უცხო მოქალაქისთვის მუშაობის უფლების გაცემის ბერკეტი სახელმწიფოსგან.

"მოქმედი კანონმდებლობის თანახმად, საქართველოში უცხო ქვეყნის მოქალაქის დასაქმებისთვის სავალდებულოა მხოლოდ მისი შრომითი მიგრაციის სპეციალურ ელექტრონულ სისტემაში რეგისტრაცია (რომელსაც ახორციელებს ამ უცხოელის დამსაქმებელი). კანონმდებლობა არ ადგენს მექანიზმებს, რომლითაც შრომის ბაზრის ინტერესებიდან გამომდინარე, სახელმწიფოს საშუალებას მისცემდა უარი ეთქვა უცხოელისთვის საქართველოში დასაქმებაზე. აღნიშნული კი, თავის მხრივ, ხშირ შემთხვევაში განაპირობებს საქართველოში არაკვალიფიციური ან ჭარბი ოდენობის მუშახელის შემოსვლას, რაც საბოლოო ჯამში, ნეგატიურად აისახება როგორც ადგილობრივ სამუშაო ძალაზე, ასევე შრომის ბაზრის ინტერესებზეც," — ვკითხულობთ განმარტებით ბარათში.

ოცნების პარლამენტმა აღნიშნული ცვლილებები III მოსმენით 2025 წლის 26 ივნისს მიიღო. კანონში ცვლილებების ინიციატორები არიან — შოთა ბერეკაშვილი, ანტონ ობოლაშვილი, მარიამ ლაშხი, გიორგი ბარვენაშვილი, ირაკლი მეზურნიშვილი, ლევან მაჭავარიანი, ზაზა ლომინაძე, ვახტანგ თურნავა, ირაკლი კირცხალია.