ოსკარიოსანმა მსახიობმა, ცოტა ხნის წინ, 1972 წლის ფილმის, ნაპოლეონი და სამანტას გადაღებებზე მომხდარი შემზარავი შემთხვევა გაიხსენა.

მსახიობმა ინტერვიუში თქვა, რომ ცხრა წლის ასაკში გადაღების მოედანზე ლომის თავდასხმის შედეგად დღემდე მრავალი იარა აქვს დარჩენილი.

"ლომი დამესხა თავს, როცა რვანახევრის ან ცხრა წლის ვიყავი", — იხსენებს ფოსტერი — "მან ამიყვანა, შემანჯღრია, გვერდულად გადამატრიალა და მერე დამაგდო. ერთ მხარეს ორი იდეალურად სიმეტრიული ნაკბენი მქონდა, მეორე მხარეს თეძოს არეში, კიდევ ორი. ახლა, როცა გავიზარდე, წლების განმავლობაში ეს იარებიც თითქოს გადაადგილდნენ".

მსახიობმა აღნიშნა, რომ ეს საშიში მომენტი კამერაზე არ აღბეჭდილა, რადგან ყველაფერი კადრის დასრულების შემდეგ მოხდა.

"შოკში ვიყავი და ბევრი რამ არ მახსოვს", — ამბობს ფოსტერი — "მახსოვს თავად ფაქტი. დავინახე, როგორ წამოვიდა წინ მისი ფაფარი. ლომებთან მანამდეც მქონდა ნამუშევარი, მაგრამ როცა ამიყვანა და შემანჯღრია, მერე, როცა უკან შემაბრუნა და კამერების მიმართულებით მიმათრევდა, დავინახე, როგორ გაიქცა მთელი გადამღები ჯგუფი. ვხედავდი, როგორ გარბოდნენ, ყველანი აპარატურით ხელში, უბრალოდ ჩემგან შორს".

მსახიობმა თქვა, რომ საბოლოოდ ცხოველის მწვრთნელმა სიტუაცია გააკონტროლა, თუმცა ეს მაინც ერთ-ერთი ყველაზე საშიში გამოცდილება იყო მის კარიერაში.

"როგორც ჩანს, მწვრთნელმა უთხრა: 'დააგდე!' და ლომმაც პირი გამიშვა", — იხსენებს იგი — "ალბათ ეს იყო ყველაზე საშიში რამ, რაც კი ოდესმე გადაღებისას გადამხდომია".

გამოჯანმრთელების შემდეგ, თავიდასხმის მიუხედავად, ისევ იმავე ლომთან მოუწია მუშაობა, რამაც მოგვიანებით კიდევ უფრო საშიში სიტუაცია შექმნა.

"როცა საავადმყოფოდან გამოვედი და გადაწყვიტეს, რომ მუშაობა შემეძლო, გადასაღებად ისევ იმავე ლომთან დავბრუნდი, მაგრამ ამ დროს ხელში მამალი მეჭირა", — ამბობს ფოსტერი — "ეს მამალი არ იყო მიჩვეული კონკრეტულად ამ ლომთან მუშაობას. დავინახე, როგორ მოატრიალა ლომმა თავი და თითქოს ჩემკენ წამოსვლას აპირებდა. მაშინ მამალი ვისროლე და გავიქეცი. მგონია, აქ კიდევ უფრო მეტად შემეშინდა, ვიდრე პირველად."

ნაპოლეონი და სამანტაში ასევე მონაწილეობდნენ ჯონი ვიტაკერი და მაიკლ დაგლასი. ფილმი ორ ბავშვზე მოგვითხრობს, რომლებიც ოდესღაც ცირკის მსახიობ ლომთან ერთად მოგზაურობას იწყებენ.